ប្រទេសបួគីណាហ្វាសូ៖បើតាមប្រភពជាច្រើនបាននិយាយកាលពីថ្ងៃអង្គារថាមនុស្សប្រមាណជា៤០នាក់ក្នុងនោះមានទាំងកម្លាំងជំនួយត្រូវបានសម្លាប់កាលពីចុងសប្តាហ៍ក្នុងការវាយប្រហារភេរវកម្ម២លើកនៅភាគពាយ័ព្យនៃប្រទេសបួគីណាហ្វាសូ។
លោកអភិបាលស្រុកបាននិយាយនៅក្នុងសេចក្តីថ្លែងការណ៍កាលពីថ្ងៃអាទិត្យដោយពុំបានបញ្ជាក់លម្អិតអំពីចំនួនអ្នកស្លាប់ថា ការវាយប្រហារលើកទីមួយសំដៅទៅលើក្បួនរថយន្តប្រដាប់អាវុធនៅក្បែរតំបន់ប៉ូរ៉ាសូ នៃស្រុក ប៊ូក្លេ ឌូ មូហូន កាលពីថ្ងៃសៅរ៍។
អ្នកស្រុកបានប្រាប់អ្នកយកព័ត៌មានថាមនុស្សប្រមាណជា២០នាក់ក្នុងនោះមានទាំងកម្លាំងជំនួយត្រូវបានសម្លាប់ក្នុងការវាយប្រហារខណៈដែលភ្នាក់ងារព័ត៌មានបួគីណាបាននិយាយថាអ្នកប្រយុទ្ធ១៨នាក់ដែលរងរបួសគឺកំពុងស្ថិតក្រោមការព្យាបាល។
សារព័ត៌មានក្នុងស្រុកបានរាយការណ៍ថានៅក្នុងស្រុកដដែលមានការវាយប្រហារមួយផ្សេងទៀតដែលបានសម្លាប់មនុស្សប្រមាណជា ២០នាក់កាលពីថ្ងៃអាទិត្យនៅតំបន់វ៉ាការ៉ា។
យោងតាមប្រភពពីសន្តិសុខបានឱ្យដឹងថាក្រុមភេរវករជាច្រើននាក់ត្រូវបានសម្លាប់ដោយកងកម្លាំងការពារនិងកម្លាំងសន្តិសុខ ដែលជាការឆ្លើយតបទៅនឹងការវាយប្រហារទាំងនេះ។
ក្នុងសុន្ទរកថាមួយដែលបានថ្លែងកាលពីថ្ងៃអង្គារនៅចំពោះមុខក្រុមសមាជិកសភា លោកនាយករដ្ឋមន្ត្រី អាផូលីនៀរ យូអាឃីមសាន់ ខាយឡេម ដឺ ថាមបេឡា បានប្រកាសអំពីការបង្កើតកងវរសេនាតូចអន្តរាគមន៍រហ័សចំនួន៦ កងអាវុធហត្ថចំនួន៦ និងមូលដ្ឋានទ័ពអាកាសថ្មីចំនួន២ និងជ្រើសរើសទាហានថ្មីចំនួន 6,000នាក់។
ប្រមុខរដ្ឋាភិបាលបានបញ្ជាក់ជាថ្មីពីការប្តេជ្ញាចិត្តរបស់ប្រទេសបួគីណាហ្វាសូក្នុងការប្រយុទ្ធប្រឆាំងនឹងអំពើភេរវកម្ម និងមិនព្រមចរចាជាមួយក្រុមភេរវករប្រដាប់អាវុធឡើយ។
ចាប់តាំងពីឆ្នាំ២០១៥ ស្ថានភាពអសន្តិសុខនៅក្នុងប្រទេសអាហ្វ្រិកខាងលិចបានសម្លាប់មនុស្សជាច្រើននាក់ និងរាប់ពាន់នាក់ទៀតបានផ្លាស់ទីលំនៅ៕
ប្រភពព័ត៌មាន Xinhua ចុះផ្សាយថ្ងៃទី៣១ ខែឧសភា ឆ្នាំ២០២៣
