ប្រទេសកុងហ្គោ៖ ប្រភពព័ត៌មានក្នុងតំបន់បាននិយាយថា យ៉ាងហោចណាស់មនុស្ស ៤៦នាក់ត្រូវបានសម្លាប់កាលពីព្រឹកថ្ងៃចន្ទ ក្នុងហេតុការណ៍វាយប្រហារដោយក្រុមកងជីវពលទៅលើ ជំរំជនភៀសខ្លួននៅតំបន់ភាគខាងកើតនៃសាធារណៈរដ្ឋប្រជាធិបតីកុងហ្គោ។
មន្ត្រីមូលដ្ឋានម្នាក់សុំមិនបញ្ចេញឈ្មោះបាននិយាយថា អ្នកប្រយុទ្ធចេញពីក្រុមសហករណ៍សម្រាប់ការអភិវឌ្ឍន៍កុងហ្គោដែលហៅកាត់ថា CODECO បានវាយប្រហារលើជំរំឡាឡា ក្នុង ស្រុកដ្យូហ្កូ នៅខេត្តអ៊ីធួរ៉ី។ សូមបញ្ជាក់ថា CODECO គឺសមាគមន៍សម្ព័ន្ធនៃក្រុមកងជីវពលដែលធ្វើប្រតិបត្តិការនៅក្នុងសាធារណៈរដ្ឋប្រជាធិបតីកុងហ្គោ។
លោកបាននិយាយថា ជនរងគ្រោះភាគច្រើន ក្នុងនោះមានទាំងស្រ្តី និងកុមារជាច្រើន ត្រូវបានគេដុតឱ្យស្លាប់ពេលកំពុងដេកលក់។ កងទ័ពរបស់ប្រទេសនេះបានដាក់ពង្រាយកម្លាំងនៅក្នុងតំបន់ដើម្បីបង្ក្រាបក្រុមអ្នកវាយប្រហារ។
CODECO ដែលសកម្មនៅក្នុងខេត្តអ៊ីធួរ៉ីនៅរយៈពេលប៉ុន្មានឆ្នាំមកនេះ ត្រូវបានចោទប្រកាន់ពីបទសម្លាប់ជនស៊ីវិលជាច្រើននាក់៕
ប្រភព Xinhua ចុះផ្សាយថ្ងៃទី១៣ ខែមិថុនា ឆ្នាំ២០២៣
