ប្រទេសកេនយ៉ា៖ ប៉ូលិសបាននិយាយថា យ៉ាងហោចណាស់មន្ត្រីប៉ូលិស ៣នាក់ត្រូវបានសម្លាប់ក្នុងហេតុការណ៍បំផ្ទុះគ្រឿងផ្ទុះកែច្នៃនៅលើដងផ្លូវដែលធ្វើឡើងដោយក្រុមសកម្មប្រយុទ្ធអាល់ស្ហាបាប កាលពីថ្ងៃអង្គារ ក្នុងស្រុកម៉េនដឺរ៉ាភាគឦសានប្រទេសកេនយ៉ា។
បើយោងតាមរបាយការណ៍សន្តិសុខមានខ្លឹមសារថា មន្ត្រី ៤នាក់បានរងរបួសនៅពេលដែលរថយន្តរបស់ពួកគេរងការវាយប្រហារពីគ្រឿងផ្ទុះកែច្នៃដែលហៅកាត់ថា (IED) នៅតាមដងផ្លូវ បានីសា រ៉ាមូ។
ប៉ូលិសបាននិយាយថា រថយន្តនេះកំពុងអមដំណើររថយន្តក្រុងនៅពេលមានការវាយប្រហារ កើតឡើង។
ក្រុមសកម្មប្រយុទ្ធអាល់ស្ហាបាបកំពុងធ្វើប្រតិបត្តិការកម្ទេចគោលដៅទាំងផ្នែកភស្តុភារ និងកម្លាំងសន្តិសុខតាមបណ្តោយព្រំដែនរវាងប្រទេកេនយ៉ា និងប្រទេសសូម៉ាលី។ កាលពីយប់ថ្ងៃចន្ទ ជំរំប៉ូលិសនៅតំបន់ហ្កូបា វើដ ក្នុងស្រុកម៉េនដឺរ៉ា ក៏ទទួលរងការវាយប្រហារ បង្កឱ្យមានការប្រយុទ្ធគ្នារវាងប៉ូលិស និងក្រុមសកម្មប្រយុទ្ធអាល់ស្ហាបាប ដែលមានរយៈពេលមិនតិចជាងពីរម៉ោង៕
ប្រភព Xinhua ចុះផ្សាយថ្ងៃទី២១ ខែមិថុនា ឆ្នាំ២០២៣
