ប្រទេសសូម៉ាលី៖ កម្លាំងវរជននៃកងទ័ពជាតិសូម៉ាលី ដាណាប (Danab) បានសម្លាប់ក្រុមសកម្មប្រយុទ្ធអាល់ស្ហារបាប ១៣នាក់ និងបង្ករបួសដល់មនុស្សជាច្រើននាក់ ក្នុងអំឡុងពេលប្រតិបត្តិការនៅមូលដ្ឋានរបស់ក្រុមភេរវករក្នុងតំបន់ ឡូវើរ ចូបា ភាគខាងត្បូងប្រទេសសូម៉ាលី កាលពីថ្ងៃអង្គារ។
លោក អាមិដ អាប់ដូឡាហ៊ី នួ មេបញ្ជាការកងវរសេនាតូចទី១៦ នៃទីបញ្ជាការដាណាបក្នុងតំបន់បានប្រាប់ភ្នាក់ងារសារព័ត៌មានជាតិថា កម្លាំងទ័ពបានរកឃើញអាវុធមួយចំនួនក្នុងនោះមានទាំងកាំភ្លើងវែងអាកា៤៧ ចំនួន ៧ដើម និងកាំភ្លើងបាញ់ផ្លោងអាភីជីមួយដើម ក្នុងអំឡុងពេលប្រតិបត្តិការពិសេស។
លោក អាប់ដូឡាហ៊ី មិនបានធ្វើអត្ថាធិប្បាយអំពីចំនួនអ្នកស្លាប់ និងរបួសរបស់ទាហាននៃកម្លាំងទ័ពជាតិក្នុងអំឡុងពេលប្រតិបត្តិការនោះទេ។
កម្លាំងសន្តិសុខបានប្តេជ្ញាដើម្បីពង្រឹងប្រតិបត្តិការទាំងផ្លូវអាកាស និងជើងគោក ដើម្បីកម្ចាត់ក្រុមសកម្មប្រយុទ្ធអាល់ស្ហារបាប ដែលបានវាយប្រហារលើអ្នកស្រុក និងប្រមូលលុយខុសច្បាប់ពីអ្នកស្រុក។
បើទោះបីជាមានកំណើនប្រតិបត្តិការសន្តិសុខដែលធ្វើឡើងដោយរដ្ឋាភិបាលសម្ព័ន្ធមិត្តក៏ដោយ ក្រុមសកម្មប្រយុទ្ធបានបង្កើនការវាយប្រហាររបស់ពួកគេប្រឆាំងនឹងកម្លាំងសន្តិសុខ
រដ្ឋាភិបាល និងកន្លែងសាធារណៈផ្សេងទៀតដើម្បីផ្តួលរំលំរដ្ឋាភិបាល៕
ប្រភពព័ត៌មាន Xinhua ចុះផ្សាយថ្ងៃទី២៦ ខែមិថុនា ឆ្នាំ២០២៣
