ប្រទេសម៉ិកស៊ីកូ៖ មន្ត្រីប៉ូលិស ៣នាក់ ត្រូវបានសម្លាប់ និង១០នាក់ផ្សេងទៀតរងរបួសកាលពីថ្ងៃអង្គារ ក្នុងហេតុការណ៍ផ្ទុះគ្រឿងផ្ទុះកែច្នៃ នៅភាគខាងលិចខេត្តចេលីសស្កូ ប្រទេសមិចស៊ិកកូ។
យោងតាមរបាយការណ៍ក្នុងតំបន់បានឱ្យដឹងថា ហេតុការណ៍ផ្ទុះនេះបានកើតឡើងនៅក្បែររថយន្តដែលក្រុមមន្ត្រីកំពុងបើកបរ។
លោក អ៊ិនរ៉ីកេ អាលហ្វារ៉ូ អភិបាលខេត្តចេលីសស្កូ បានបង្ហោះសារលើបណ្តាញសង្គមទ្វីតធ័រមានខ្លឹមសារថា ការវាយប្រហារនេះគឺជាសកម្មភាពមិនធ្លាប់មានពីមុនមក និងបានបង្ហាញពីសមត្ថភាពរបស់ក្រុមឧក្រិដ្ឋកម្មទាំងនេះ។
គួរបញ្ជាក់ផងដែរថា របាយការណ៍ក្នុងតំបន់មានខ្លឹមសារបន្ថែមថា ខេត្តចេលីសស្កូគឺជា
មូលដ្ឋានរបស់ក្រុមជួញដូរគ្រឿងញៀនដ៏មានឥទ្ធិពលបំផុតមួយនៅក្នុងប្រទេស។ ក្រុមជួញដូរទាំងនោះមានវត្តមាននៅក្នុងតំបន់ធំមួយនៃប្រទេសម៉ិកស៊ីកូ៕
ប្រភពព័ត៌មាន Xinhua ចុះផ្សាយថ្ងៃទី១២ ខែកក្កដា ឆ្នាំ២០២៣
