ប្រទេសអាហ្វហ្កានីស្ថាន៖ លោកអភិបាលខេត្តបាននិយាយនៅក្នុងសេចក្តីថ្លែងការណ៍មួយមានខ្លឹមសារថា ក្មេង ២នាក់ ត្រូវបានសម្លាប់ និងម្នាក់ផ្សេងទៀតរងរបួសដោយសារផ្ទុះគ្រាប់មីនដែលបន្សល់ទុកកាលពីសម័យសង្គ្រាម នៅខេត្តណានហ្ការហារ ភាគខាងកើតប្រទេសអាហ្វហ្កានីស្ថាន កាលពីថ្ងៃពុធ។
ក្មេងទាំងនោះរកឃើញវត្ថុដែលមានរូបរាងដូចតុក្កតា ហើយក៏លេងវត្ថុនោះ ប៉ុន្តែក្រោយមកវាបានផ្ទុះឡើងភ្លាមៗ បណ្តាលឲ្យក្មេង២នាក់ស្លាប់នៅនឹងកន្លែងកើតហេតុ និងក្មេងម្នាក់ផ្សេងទៀតរងរបួស នៅក្នុងស្រុកអាឆីន នេះបើយោងតាមសេចក្តីថ្លែងការណ៍។
នេះគឺជាឧបទ្ទវហេតុលើកទីពីរនៅក្នុងប្រទេសអាហ្វហ្គានីស្ថានដែលហែកហួរដោយសង្រ្គាមនាពេលថ្មីៗនេះ។ គួររំលឹកផងដែរថា មានហេតុការណ៍ផ្ទុះស្រដៀងគ្នាមួយផ្សេងទៀតបានកើតឡើងនៅក្នុងស្រុក ខាវ៉ាចា សាប ផុស នៃខេត្តហ្វាចាប ដោយបានសម្លាប់ក្មេង ៣នាក់ និងបង្ករបួស ៣នាក់ផ្សេងទៀតកាលពី១០ថ្ងៃមុន។
ប្រទេសអាហ្វហ្កានីស្ថានគឺជាប្រទេសមួយក្នុងចំណោមប្រទេសដែលមានគ្រាប់មីនបង្កប់ច្រើនបំផុតនៅលើពិភពលោក។ ជារៀងរាល់ខែ ហេតុការណ៍ផ្ទុះគ្រាប់ដែលបន្សល់ទុកពីសង្គ្រាមរយៈពេលបួនទសវត្សរ៍ និងសង្គ្រាមស៊ីវិលកន្លងមកបានបង្កររបួស្នាម និងសម្លាប់មនុស្សជាច្រើននាក់ ដែលភាគច្រើនជាកុមារ៕
ប្រភពព័ត៌មាន Xinhua ចុះផ្សាយថ្ងៃទី12 ខែកក្កដា ឆ្នាំ២០២៣
