ប្រទេសអ៊ីរ៉ាក់៖ ក្រុមកងជីវពលស្ហីអ៊ីតអ៊ីរ៉ាក់បានអះអាងទទួលខុសត្រូវចំពោះការវាយប្រហារកាលពីព្រលឹមថ្ងៃអាទិត្យ ទី២២ ខែតុលា ទៅលើកន្លែងស្នាក់នៅរបស់អ្នកជំនាញ និងភ្នាក់ងារទ័ពអាកាសអាមេរិកនៅខេត្តអានបា ភាគខាងលិចប្រទេសអ៊ីរ៉ាក់។
ក្រុមប្រដាប់អាវុធបានហៅខ្លួនឯងថា ចលនារដ្ឋអ៊ីស្លាមក្នុងប្រទេសអ៊ីរ៉ាក់ ដោយបានអះអាងក្នុងសេចក្តីថ្លែងការណ៍អនឡាញថា ក្រុមសកម្មប្រយុទ្ធរបស់ពួកគេបានបញ្ជាយន្តហោះគ្មានមនុស្សបើកចំនួន២គ្រឿងដែលមានបំពាក់គ្រាប់បែក ហោះហើរនៅលើមូលដ្ឋានអាកាស អ៊ីន អាល អាសាដ នៅក្បែរទីប្រជុំជន អាល បាកដាដឌី ដែលមានចម្ងាយប្រមាណជា១៩០គីឡូម៉ែត្រ ភាគពាយ័ព្យនៃរាជធានីបាកដាដ។
យោងតាមសេចក្តីថ្លែងការណ៍បានឲ្យដឹងថា ស្ថានភាពជាក់ស្តែងដែលមិនអាចផ្ទៀងផ្ទាត់ដោយឯករាជ្យនោះគឺថា យន្តហោះគ្មានមនុស្សបើកទាំងពីរគ្រឿងបានវាយប្រហារចំគោលដៅដែលបានកំណត់។
កាលពីព្រលឹមថ្ងៃអាទិត្យ មន្ត្រីម្នាក់មកពីកងទ័ពអ៊ីរ៉ាក់ដែលសុំមិនបញ្ចេញឈ្មោះបានប្រាប់អ្នកយកព័ត៌មានថា ការវាយប្រហារនោះបានធ្វើឱ្យខូចខាតសម្ភារៈតិចតួចប៉ុណ្ណោះ។
មន្ត្រីរូបនោះបានបន្ថែមទៀតថា កម្លាំងសន្តិសុខអ៊ីរ៉ាក់នៅក្នុងតំបន់បានឡោមព័ទ្ធមូលដ្ឋានទ័ពអាកាស និងបើកប្រតិបត្តិការរុករក។
ក្នុងរយៈពេលប៉ុន្មានថ្ងៃនេះ ក្រុមសកម្មប្រយុទ្ធបានអះអាងថាបានបាញ់គ្រាប់រ៉ូកែត និងវាយប្រហារដោយយន្តហោះគ្មានមនុស្សបើកទៅលើកន្លែងស្នាក់នៅរបស់កម្លាំងទ័ពអាមេរិក នៅទូទាំងប្រទេស។ ក្រុមនេះថែមទាំងបានអះអាងទទួលខុសត្រូវចំពោះការវាយប្រហារស្រដៀងគ្នាពីមុនមកទៅលើកម្លាំងយោធាអាមេរិកនៅក្នុងប្រទេសស៊ីរី៕
ប្រភពព័ត៌មាន Xinhua ចុះផ្សាយថ្ងៃទី២៣ ខែតុលា ឆ្នាំ២០២៣
