ប្រទេសយេម៉ែន៖ ភ្នាក់ងារសារព័ត៌មានរដ្ឋសាបាបានរាយការណ៍ថា ក្រុមឧទ្ទាមហ៊ូធីបានបើកការវាយប្រហារកាលពីថ្ងៃចន្ទ ទី២៣ ខែតុលា ទៅលើខេត្តថេហ្សភាគនិរតីនៃប្រទេសយេម៉ែន ដោយបានសម្លាប់មនុស្សយ៉ាងហោចណាស់ម្នាក់ និងបង្ករបួសដល់ក្មេង ២នាក់ផ្សេងទៀត។
នៅក្នុងរបាយការណ៍មានខ្លឹមសារថា ក្រុមឧទ្ទាមហ៊ូធីបានវាយប្រហារកំណត់គោលដៅទៅលើអ្នកតាំងលំនៅនៃតំបន់រ៉ាដាស់ ដោយប្រើកាំភ្លើងត្បាល់បាញ់ផ្លោងមិនរើសមុខ និងបានសម្លាប់មនុស្សម្នាក់ និងបង្ករបួសដល់ក្មេង ២នាក់។
ខេត្តថេហ្សបានជាប់គាំងក្នុងសង្គ្រាមស៊ីវិលយេម៉ែនចាប់តាំងពីក្រុមឧទ្ទាមហ៊ូធីបានប៉ុនប៉ងដណ្តើមការគ្រប់គ្រងប្រទេសវិញទាំងស្រុងកាលពីឆ្នាំ២០១៥។ ក្រុមឧទ្ទាមបានឡោមព័ទ្ធខេត្តថេហ្ស ប៉ុន្តែមិនទាន់ដណ្តើមបានតំបន់ទាំងអស់ពីកម្លាំងរដ្ឋាភិបាលយេម៉ែនមកវិញនោះទេ។
យោងតាមប្រជាពលរដ្ឋ និងមន្ត្រីបានបញ្ជាក់ឱ្យដឹងថា ជាញឹកញាប់ ក្រុមឧទ្ទាមហ៊ូធីបានវាយប្រហារកំណត់គោលដៅទៅលើខេត្តថេហ្សដោយការបាញ់រះ និងការលបបាញ់។
ក្រុមឧទ្ទាមហ៊ូធីមិនទាន់បានបញ្ចេញមតិចំពោះការវាយប្រហារនេះទេ។
គួររំលឹកផងដែរថា សង្គ្រាមស៊ីវិលយេម៉ែនបានចាប់ផ្តើមកាលពីឆ្នាំ២០១៤ នៅពេលដែលក្រុមឧទ្ទាមហ៊ូធីដណ្តើមបានការគ្រប់គ្រងលើរាជធានីសាណ និងតំបន់មួយចំនួននៅភាគខាងជើង។ កម្លាំងសម្ព័ន្ធដឹកនាំដោយអារ៉ាប៊ីសាអូឌីតបានធ្វើអន្តរាគមន៍កាលពីឆ្នាំ២០១៥ដើម្បីជួយស្តាររដ្ឋាភិបាលយេម៉ែន។ ជម្លោះនោះបានសម្លាប់មនុស្សរាប់ពាន់នាក់ និងបានបង្កជាវិបត្តិមនុស្សធម៌ដ៏អាក្រក់បំផុតរបស់ពិភពលោក៕
ប្រភពព័ត៌មាន Xinhua ចុះផ្សាយថ្ងៃទី២៤ ខែតុលា ឆ្នាំ២០២៤
