ប្រទេសមិកស៊ិកកូ៖ បុគ្គលិកការិយាល័យមេធាវីរដ្ឋបាននិយាយកាលពីថ្ងៃចន្ទ ទី២៣ ខែតុលាថា យ៉ាងហោចណាស់មន្ត្រីប៉ូលិស ១៣នាក់ត្រូវបានសម្លាប់ក្នុងការវាយប្រហារប្រដាប់អាវុធនៅក្នុងរដ្ឋហ្កូរៀររូ ភាគនិរតីប្រទេសមិកស៊ិកកូ។
បើតាមរបាយការណ៍ប៉ូលិសបានឱ្យដឹងថា ហេតុការណ៍នេះបានកើតឡើងកាលពីថ្ងៃចន្ទ ទី២៣ ខែតុលា នៅក្នុងទីក្រុង អេល ផាផាយូ ខាងក្រោមសាលាក្រុងឃូយូកា ដឺបេនី ថេហ្ស។ ក្រុមប៉ូលិសរងការវាយប្រហារពីក្រុមប្រដាប់អាវុធនៅក្បែរផ្លូវហាយវេរសហព័ន្ធ អាកបូលខូ ហ្ស៊ីហ័តថាណេហូ។
លោក ហ្កាប្រៀល អាឡិចជេនដ្រូ ហឺណាដ្រូ ហឺណានដេហ្ស មិនដូហ្សា ព្រះរាជអាជ្ញារងនៃផ្នែកស៊ើបអង្កេតរដ្ឋហ្កូរៀររូ បានបញ្ជាក់ក្នុងសន្និសីទតាមរយៈវីដេអូថា ក្នុងចំណោមអ្នកស្លាប់មានប្រធានប៉ូលិស ២នាក់ ដោយម្នាក់ក្នុងចំណោមពួកគេ លោក អាល ហ្វ្រេដូ អាឡនសូ ឡូផេហ្ស ជាលេខាធិការសន្តិសុខសាធារណៈទីក្រុងឃូយូកា ដឺបេនី ថេហ្ស។
ខាងនគរបាលជាតិបានសម្រេចពង្រឹងនូវការការពារ និងការឃ្លាំមើលរបស់ខ្លួននៅក្នុងទីក្រុង ឃូយូកា ដឺបេនី ថេហ្ស។
គួរបញ្ជាក់ផងដែរថា ហ្គូរៀររូ គឺជារដ្ឋមួយរបស់ប្រទេសមិចស៊ិកកូដែលរងផលប៉ះពាល់ច្រើនបំផុតដោយក្រុមឧក្រិដ្ឋជនហិង្សា ដែលកាលពីពេលថ្មីៗនេះបានបង្កើនសកម្មភាពរបស់ពួកគេប្រឆាំងនឹងភ្នាក់ងារសន្តិសុខដែលប្រយុទ្ធប្រឆាំងនឹងពួកគេ៕
ប្រភព Xinhua ចុះផ្សាយថ្ងៃ២៤ ខែតុលា ឆ្នាំ២០២៣
