ប្រទេសកាមេរូន៖ យោងតាមប្រភពពី សន្តិសុខ និងអ្នកស្រុកបានបញ្ជាក់កាលពីថ្ងៃពុធ ទី២២ ខែវិច្ឆិកា ឱ្យដឹងថា យ៉ាងហោចណាស់ជនស៊ីវិល ៣នាក់ត្រូវបានសម្លាប់ បន្ទាប់ពីក្រុម
បូកូហារ៉ាមលបវាយឆ្មក់លើសហគមន៍ចំនួន ២នៅក្នុងតំបន់ហ្វាណ័សនៃប្រទេសកាមេរូន។
ប្រភពសន្តិសុខដែលបានដឹងពីហេតុការណ៍នេះបាននិយាយថា ក្រុមសកម្មប្រយុទ្ធនៃក្រុមភេរវករ បានវាយឆ្មក់លើម៉ូតូ ២គ្រឿងដែលកំពុងបើកបរតាមបណ្តោយផ្លូវនៅក្នុងតំបន់ដ្យួរូ កាលពីថ្ងៃអង្គារ ទី២១ ខែវិច្ឆិកា ដោយបានសម្លាប់មនុស្ស ២នាក់មុនពេលពួកគេជិះរត់គេចខ្លួន។
ប្រភពដដែលប្រាប់បន្ថែមឱ្យដឹងទៀតថា ចាប់ពីយប់ថ្ងៃអង្គារដល់ព្រឹកថ្ងៃពុធ ក្រុមសកម្មប្រយុទ្ធបន្តបាញ់ទៅលើបុរសវ័យកណ្តាលម្នាក់នៅលើដងផ្លូវដដែល។
ប្រទេសកាមេរូន បានបង្កើនសន្តិសុខក្នុងតំបន់ ខណៈពិធីបុណ្យឆ្លងឆ្នាំខិតចូលមកដល់ ដោយបានសម្លាប់ក្រុមបូកូហារ៉ាម ១០នាក់ និងចាប់បានសមាជិកមួយចំនួនផ្សេងទៀតក្នុងរយៈពេល ២សប្តាហ៍មកនេះ។
ប្រភពបានបន្ថែមទៀតថា ក្រុមភេរវករបានសម្លាប់ជនស៊ីវិលប្រមាណជា ១២នាក់ និងទាហាន ២នាក់ កាលពីដើមខែវិច្ឆិកា៕
ប្រភពព័ត៌មាន Xinhua ចុះផ្សាយថ្ងៃទី២២ ខែវិច្ឆិកា ឆ្នាំ២០២៣
