ប្រទេសស៊ីរី៖ ភ្នាក់ងារសារព័ត៌មានរដ្ឋបានរាយការណ៍ថា គ្រាប់មីស៊ីលរបស់អ៊ីស្រាអែលបានវាយប្រហារទៅលើតំបន់ជុំវិញទីក្រុងដាម៉ាស កាលពីយប់ថ្ងៃអាទិត្យ ទី១០ ខែធ្នូ ដែលជាការវាយប្រហារចុងក្រោយកំណត់គោលដៅលើទីតាំងយោធានៅក្នុងប្រទេសស៊ីរី។
ហេតុការណ៍ផ្ទុះដ៏ខ្លាំងក្លាជាច្រើនបានបន្លឺឡើងនៅទូទាំងទីក្រុងដាម៉ាសពេញមួយយប់។ យោធានៃកងទ័ពស៊ីរីបាននិយាយនៅក្នុងសេចក្តីថ្លែងការណ៍ថា ការវាយប្រហារអ៊ីស្រាអែលបានវាយប្រហារចេញពីតំបន់ហ្គូលេន ហាយ ប្រទេសស៊ីរី។
ប្រភពបានបន្ថែមថា ប្រព័ន្ធការពារដែនអាកាសស៊ីរីបានបាញ់ទម្លាក់គ្រាប់មីស៊ីលមួយចំនួនដោយបានបណ្តាលឱ្យសម្ភារៈមួយចំនួនរងការខូចខាត។
បើយោងតាមអ្នកឃ្លាំមើលសិទ្ធិមនុស្សក្នុងសង្រ្គាមស៊ីរីបាននិយាយថា គ្រាប់មីស៊ីលអ៊ីស្រាអែល បានវាយប្រហារកំណត់គោលដៅទៅលើទីតាំងមួយចំនួននៅក្នុងតំបន់ហ្សេដា ហ្សីណាប និងនៅអាកាសយាន្តដ្ឋានអន្តរជាតិដាម៉ាស ក្នុងខេត្តដាម៉ាស ជាកន្លែងដែលក្រុមហេបូឡាលីបង់ និងយោធាអ៊ីរ៉ង់បោះទីតាំង។
អ្នកឃ្លាំមើលសិទ្ធិមនុស្សបានបន្ថែមទៀតថា ទីតាំងរបស់ប្រព័ន្ធការពារដែនអាកាសស៊ីរីរងការវាយប្រហារកំណត់គោលដៅ ប៉ុន្តែពុំមានព័ត៌មានលម្អិតពីចំនួនអ្នកស្លាប់នោះទេ។
អ្នកឃ្លាំមើលសិទ្ធិមនុស្សបាននិយាយថា ចាប់តាំងពីដើមឆ្នាំ២០២៣ ពួកគេបានកត់ត្រាការវាយប្រហាររបស់អ៊ីស្រាអែលទៅលើទឹកដីស៊ិរីមានចំនួន ៦២លើក។
កម្លាំងអ៊ីស្រាអែលបានវាយប្រហារតាមអាកាសជាច្រើនលើកក្នុងប្រទេសស៊ីរីកាលពីប៉ុន្មានឆ្នាំចុងក្រោយមកនេះ ដោយបានកំណត់គោលដៅទៅលើក្រុមជីវពលដែលគាំទ្រដោយអ៊ីរ៉ង់ និងបានដឹកជញ្ជូនអាវុធដែលគេជឿថាជាជំនួយទៅដល់ក្រុមហេបូឡាលីបង់។
គេជឿជាក់ថា ការវាយប្រហារទាំងនេះជាការទប់ស្កាត់ការពង្រឹងសមត្ថភាពប្រដាប់អាវុធរបស់ក្រុមហេសបូឡា ដោយប្រទេសអ៊ីស្រាអែលបានចាត់ទុកថាវាជាការគំរាមកំហែងយ៉ាងខ្លាំងដល់សន្តិសុខជាតិរបស់ខ្លួន៕
ប្រភព Xinhua ចុះផ្សាយថ្ងៃទី១១ ខែធ្នូ ឆ្នាំ២០២៣
