ប្រទេសស៊ីរី៖ យោងតាមភ្នាក់ងារសារព័ត៌មានរដ្ឋសាណាបានបញ្ជាក់ឱ្យដឹងថា ក្មេង២នាក់ស្លាប់កាលពីថ្ងៃអាទិត្យ ទី១៧ ខែធ្នូ ដោយសារផ្ទុះគ្រាប់មីនបង្កប់ដែលគេជឿថាជាសំណល់សង្គ្រាមដែលបន្សល់ទុកដោយក្រុមភេរវកររដ្ឋអ៊ីស្លាមនៅភាគខាងកើតប្រទេសស៊ីរី។
ក្មេង២នាក់ ម្នាក់អាយុ១០ឆ្នាំ និងម្នាក់១២ឆ្នាំ ជាបងប្អូននឹងគ្នានេះបើយោងតាមសេចក្តីរាយការណ៍។
លោក ចូបាល អាល សាយៀរ ប្រធានក្រុមប្រឹក្សាក្រុងបាននិយាយក្នុងសេចក្តីថ្លែងការណ៍ថា គ្រាប់មីនត្រូវបានរកឃើញកប់ក្រោមដីក្នុងអគារដែលគេបោះបង់ចោលនៅស្រុកអាលអ៊ីនស្ហាត ទីក្រុងអាលបូកាម៉ាលភាគអាគ្នេយ៍ខេត្តឌៀរ អេហ្ស័រ។
ភ្នាក់ងារសារព័ត៌មានរដ្ឋបានរាយការណ៍ថា ក្រុមភេរវករបាននិងកំពុងបង្កប់គ្រាប់មីន និងគ្រឿងផ្ទុះយុទ្ធសាស្ត្រក្នុងចំណោមតំបន់លំនៅឋាន ផ្លូវថ្នល់ និងដីកសិកម្ម មុនពេលដកថយចេញពីទឹកដីដែលកងទ័ពស៊ីរីដណ្តើមបាន។
ប្រភពបានបញ្ជាក់បន្ថែមថា យុទ្ធសាស្ត្របែបនេះមិនត្រឹមតែមានគោលបំណងធ្វើឱ្យប៉ះពាល់ដល់ការវិលត្រលប់របស់ជនស៊ីវិលប៉ុណ្ណោះទេ ប៉ុន្តែថែមទាំងបង្កភាពភ័យខ្លាច និងរារាំងដល់ការត្រឡប់មករស់នៅលំនៅដ្ឋានប្រកបដោយសុវត្ថិភាពនៅក្នុងតំបន់រំដោះបាននោះផងដែរ៕
ប្រភពព័ត៌មាន Xinhua ចុះផ្សាយថ្ងៃទី១៨ ខែធ្នូ ឆ្នាំ២០២៣
