ប្រទេសតួកគី៖ ភ្នាក់ងារសារព័ត៌មានពាក់កណ្តាលផ្លូវការអាណាដូឡូបានរាយការណ៍កាលពីថ្ងៃអង្គារ ទី១៩ ថា ក្រុមចារកម្មទួកគីបានឃុំខ្លួនសមាជិកប្រធានរដ្ឋបាល និងហិរញ្ញវិត្ថុរបស់ក្រុមសកម្មប្រយុទ្ធរដ្ឋអ៊ីស្លាម (IS) ក្នុងប្រតិបត្តិការនៅប្រទេសស៊ីរី។
ភ្នាក់ងារសារព័ត៌មានអាណាដូឡូបានដកស្រង់ព័ត៌មានពីប្រភពសន្តិសុខអនាមិកមានខ្លឹមសារថា ជនសង្ស័យជាក្រុមសកម្មប្រយុទ្ធរដ្ឋអីស្លាម លោក ហូហ្ស៊ីហ្វេ អាល មូរ៉ី ដែលមានឈ្មោះហៅក្រៅ អ៊ីយូប ត្រូវបានចាប់ខ្លួន នៅខេត្តមើរស៊ីន ភាគខាងត្បូងនៃប្រទេសតួកគី។
ប្រភពព័ត៌មានអាណាដូឡូបានបញ្ជាក់បន្ថែមថា កម្លាំងសន្តិសុខតួកគីបានរឹបអូសទឹកប្រាក់បានចំនួន ២៨.៨០០ដុល្លារ ប្រាក់ ១៤.៩៥០អ៊ឺរ៉ូ រូបិយប័ណ្ណតួកគី ៣១.៨០០តួកគីលីរ៉ាស និងសម្ភារៈឌីជីថលជាច្រើនរបស់ក្រុមភេរវករក្នុងអំឡុងពេលវាយឆ្មក់។ អាជ្ញាធរតួកគីបានរកឃើញកម្មវិធីទូរស័ព្ទដែលក្រុមសកម្មប្រយុទ្ធរដ្ឋអ៊ីស្លាម (IS) ប្រើដើម្បីផ្ទេរប្រាក់។
នៅក្នុងការផ្តល់សាក្សីកម្ម លោក ហូហ្ស៊ីហ្វេ អាល មូរ៉ី បានលម្អិតព័ត៌មានអំពីដំណើរការនៃការចូលរួមរបស់ក្រុមភេរវករ សកម្មភាពរបស់គាត់នៅក្នុងប្រទេស៊ីរីនិងតួកគី ក្រុមភេរវករដែលគាត់មានទំនាក់ទំនងជាមួយ និងការផ្ទេរប្រាក់របស់គាត់។
រដ្ឋាភិបាលតួកគីបានចាត់ទុកក្រុមសកម្មប្រយុទ្ធរដ្ឋអ៊ីស្លាម (IS) ថាជាអង្គភាពភេរវករកាលពីឆ្នាំ២០១៣ ដោយបានស្តីបន្ទោសពួកគេចំពោះការវាយប្រហារនៅក្នុងប្រទេសចាប់តាំងពីឆ្នាំ២០១៥។
តំបន់ព្រំដែនភាគខាងត្បូងរបស់ប្រទេសតួកជាប់ប្រទេសស៊ីរី គឺជាចំណុចឆ្លងកាត់ដ៏សំខាន់មួយសម្រាប់ប្រជាជនស៊ីរី និងយុទ្ធជនបរទេស ចាប់តាំងពីសង្គ្រាមស៊ីវិលបានផ្ទុះឡើងនៅក្នុងប្រទេសអារ៉ាប់កាលពីឆ្នាំ២០១១៕
ប្រភព Xinhua ចុះផ្សាយថ្ងៃទី២០ ខែធ្នូ ឆ្នាំ២០២៣
