រដ្ឋប៉ាឡេស្ទីន៖ ភ្នាក់ងារសារព័ត៌មានផ្លូវការរបស់ប៉ាឡេស្ទីនវ៉ាហ្វាបានរាយការណ៍កាលពីថ្ងៃអាទិត្យ ទី០៧ ខែមករា ថា ទាហានអ៊ីស្រាអែលបានបើកការវាយប្រហារតាមអាកាសកាលពីយប់ថ្ងៃសៅរ៍ ទី០៦ ខែមករា ឆ្នាំ២០២៤ ទៅលើជំរំជនភៀសខ្លួនចាបាលៀ នៅភាគខាងជើងតំបន់ហ្កាហ្សាស្ទ្រីប ដោយបានសម្លាប់មនុស្សយ៉ាងហោចណាស់ ២០នាក់។
យោងតាមរបាយការណ៍បានឲ្យដឹងថា អ្នករងរបួសជាច្រើននាក់ត្រូវបានបញ្ជូនទៅកាន់មន្ទីពេទ្យ ហើយក្នុងចំណោមពួកគេទាំងនោះស្ថិតក្នុងស្ថានភាពធ្ងន់ធ្ងរជាច្រើននាក់។
ប្រភពក្នុងតំបន់បានប្រាប់អ្នកយកព័ត៌មានថា មានមនុស្សជាច្រើននាក់ជាប់ក្រោមគំនរបាក់បែក ហើយចំនួនអ្នកស្លាប់អាចនឹងកើនឡើងបន្ថែមទៀត។
ក្រសួងសុខភិបាលដែលមានមូលដ្ឋាននៅតំបន់ហ្កាហ្សាបាននិយាយកាលពីថ្ងៃអាទិត្យ ទី០៧ ខែមករា ឆ្នាំ២០២៤ ថា ការវាយប្រហារជាបន្តបន្ទាប់របស់អ៊ីស្រាអែលទៅលើតំបន់
ហ្កាហ្សាស្ទ្រីបបណ្តាលឱ្យចំនួនអ្នកស្លាប់ជាជនជាតិប៉ាឡេស្ទីនកើនដល់ ២២.៨៣៥នាក់ និងអ្នករងរបួសកើនដល់ ៥៨.៤១៦នាក់។
នៅក្នុងសេចក្តីថ្លែងការណ៍មន្ត្រីក្រសួងបាននិយាយថា ទាហានអ៊ីស្រាអែលវាយប្រហារតាមអាកាស ១២លើកទៅលើពលរដ្ឋជាច្រើនគ្រួសារនៅក្នុងតំបន់ហ្កាហ្សាស្ទ្រីប ដែលបណ្តាលឲ្យជនជាតិប៉ាឡេស្ទីន ១៣៣នាក់ស្លាប់ និងមនុស្ស ២៥០នាក់ផ្សេងទៀតរងរបួស ក្នុងរយៈពេល ២៤ម៉ោងចុងក្រោយនេះ។
អាជ្ញាធរអ៊ីស្រាអែលបានបញ្ជាក់ឱ្យដឹងថា ចាប់តាំងពីថ្ងៃទី០៧ ខែតុលា ឆ្នាំ២០២៣មក ប្រទេសអ៊ីស្រាអែលបានបើកប្រតិបត្តិការយោធាទ្រង់ទ្រាយធំនៅក្នុងទឹកដីប៉ាឡេស្ទីន បន្ទាប់ពីមានការវាយប្រហារមិនធ្លាប់មានរបស់ក្រុមហាម៉ាសទៅលើទឹកដីភាគខាងត្បូងនៃប្រទេសអ៊ីស្រាអែលដែលបានសម្លាប់ជនជាតិអ៊ីស្រាអែលប្រមាណជា ១.២០០នាក់៕
ប្រភព Xinhua ចុះផ្សាយថ្ងៃទី០៧ ខែមករា ឆ្នាំ២០២៤
