ប្រទេសសូម៉ាលី៖ ក្រុមមន្ត្រីបាននិយាយកាលពីថ្ងៃអាទិត្យ ទី០៧ ខែមករា ឆ្នាំ២០២៤ ថា កងទ័ពជាតិសូម៉ាលីដែលហៅកាត់ថា (SNA) ដែលគាំទ្រដោយកងកម្លាំងដៃគូអន្តរជាតិ បានសម្លាប់ក្រុមសកម្មប្រយុទ្ធ អាល ស្ហាបាប ៧៦នាក់ និងបង្ករបួសស្នាមដល់ក្រុមសកម្មប្រយុទ្ធជាច្រើននាក់ បន្តាប់ពីការធ្វើប្រតិបត្តិការរយៈពេល ២ថ្ងៃនៅក្នុងតំបន់មូដុក ភាគកណ្តាលប្រទេសសូម៉ាលី។
លោក អ៊ីប្រាហ៊ីម ស្ហៀក មូហ៊ីឌីន មេបញ្ជាការកងទ័ពជាតិសូម៉ាលីបាននិយាយថា មេដឹកនាំជាន់ខ្ពស់របស់ក្រុមសកម្មប្រយុទ្ធ អាល ស្ហាបាប គឺស្ថិតក្នុងចំណោមអ្នកស្លាប់ ក្នុងពេលវាយលុករបស់យោធាទៅលើក្រុមភេរវករដែលមានទំនាក់ទំនងជាមួយក្រុមសកម្មប្រយុទ្ធ អាល កៃដា ដែលធ្វើឡើងកាលពីព្រឹកថ្ងៃសៅរ៍ ទី០៦ ខែមករា និងថ្ងៃអាទិត្យ ទី០៧ ខែមករា ឆ្នាំ២០២៤។
លោក មូហ៊ីឌីនបាននិយាយថា “ក្រុមភេរវករ អាល ស្ហាបាប រងរបួសធ្ងន់ធ្ងរ និងបាត់បង់ក្រុមសកម្មប្រយុទ្ធចំនួន៧៦នាក់ ក្នុងប្រតិបត្តិការដែលបានធ្វើឡើងកាលពី២ថ្ងៃមុន។”
លោកបានបន្ថែមថា ការវាយប្រហាររបស់យោធាបានបំផ្លាញមូលដ្ឋាន និងរថយន្តរបស់ក្រុមសកម្មប្រយុទ្ធ អាល ស្ហាបាប។ កងទ័ពកំពុងបង្កើនដំណើរការកម្ចាត់ក្រុមសកម្មប្រយុទ្ធចេញពីទីតាំងរឹងមាំរបស់ពួកគេនៅភាគកណ្តាល និងភាគខាងត្បូងប្រទេសសូម៉ាលី។
ក្រុមសកម្មប្រយុទ្ធជ្រុលនិយម អាល ស្ហាបាប ដែលកំពុងប្រយុទ្ធដើម្បីផ្តួលរំលំរដ្ឋាភិបាល បាននឹងកំពុងប្រឈមនឹងសម្ពាធយ៉ាងខ្លាំង ហើយយប្រឈមនឹងការវាយប្រហារពីកងកម្លាំងរដ្ឋា
ភិបាលដែលគាំទ្រដោយក្រុមសកម្មប្រយុទ្ធក្នុងតំបន់ នៅភាគកណ្តាលប្រទេសសូម៉ាលី។
គួរបញ្ជាក់ផងដែរថា ក្រុមសកម្មប្រយុទ្ធជ្រុលនិយមត្រូវបានបណ្តេញចេញពីទីក្រុងមូហ្កាឌីស្យុ កាលពីឆ្នាំ២០១១ ប៉ុន្តែក្រុមភេរវករគឺនៅតែមានសមត្ថភាពវាយប្រហារដោយកំណត់គោលដៅទៅលើទីតាំងសណ្ឋាគារ អាហារដ្ឋាន និងទីតាំងសាធារណៈជាច្រើនផ្សេងទៀត៕
ប្រភព Xinhua ចុះផ្សាយថ្ងៃទី០៧ ខែមករា ឆ្នាំ២០២៤
