ប្រភពយោធាកូរ៉េខាងត្បូងបានរាយការណ៍ថា កូរ៉េខាងជើងបាញ់សាកល្បងមីសីលជាច្រើនគ្រាប់ចូលទៅសមុទ្រលឿងកាលពីថ្ងៃពុធនេះ។ ដំណឹងនេះលេចឮខណៈដែលភាពតានតឹងកំពុងកើនឡើងក្នុងឧបទ្វីបនេះ ដោយសារការបាញ់សាកល្បងមីសីលជាបន្តបន្ទាប់របស់ទីក្រុងព្យុងយ៉ាង និងល្បែងសង្គ្រាមរួមដៃគ្នារវាងអាមេរិកជាមួយកូរ៉េខាងត្បូងនៅក្នុងតំបន់។
ទីក្រុងសេអ៊ូលនឹងឃ្លាំមើលសញ្ញាផ្សេងៗទៀតអំពីការបាញ់គ្រាប់មីសីល ដែលធ្វើការយ៉ាងជិតស្និទ្ធជាមួយសហរដ្ឋអាមេរិក នេះជាការលើកឡើងរបស់អគ្គសេនាធិការចម្រុះកូរ៉េខាងត្បូងធ្វើឡើងកាលពីថ្ងៃពុធនេះ ហើយលោកបានពិពណ៌នាថា គឺជាការបង្ករឿង។
ការបាញ់សាកល្បងនេះធ្វើឡើងមិនដល់ពីរសប្តាហ៍ទេ បន្ទាប់ពីកូរ៉េខាងជើងបានបាញ់សាកល្បងមីស៊ីលឆ្លងទ្វីបដែលក្បាលគ្រាប់របស់វាមានលឿនជាងសំឡេង។ យោងតាមប្រព័ន្ធផ្សព្វផ្សាយរដ្ឋរាយការណ៍កាលពីសប្តាហ៍មុនថា ទីក្រុងព្យុងយ៉ាងបានសាកល្បង “ប្រព័ន្ធអាវុធនុយក្លេអ៊ែរក្រោមទឹក” ដែលជាការឆ្លើយតបទៅនឹងសមយុទ្ធទ័ពជើងទឹកដែលធ្វើឡើងដោយកូរ៉េខាងត្បូង អាមេរិក និងជប៉ុន ដែលមាននាវាផ្ទុកយន្តហោះ USS Carl Vinson ចូលរួមផងដែរ។
គួរំលឹកផងដែរថា ទីក្រុងសេអ៊ូល និងវ៉ាស៊ីនតោនបានធ្វើសមយុទ្ធបាញ់គ្រាប់ពិតនៅក្បែរព្រំដែនកូរ៉េខាងជើងកាលពីឆ្នាំមុន បើទោះបីជាមានការព្រមានម្តងហើយម្តងទៀតពីទីក្រុងព្យុងយ៉ាងក៏ដោយ ដែលបង្ហាញឲ្យឃើញថាវាជាល្បែងសង្រ្គាមក្នុងរូបភាពជាសមយុទ្ធក្នុងគោលបំណងឈ្លានពាន។ ទោះបីជាយ៉ាងណាក៏ដោយសហរដ្ឋអាមេរិក និងសម្ព័ន្ធមិត្តនិយាយថា សមយុទ្ធនេះគឺជាលំហាត់ការពារជាតិធម្មតាៗ និងចោទប្រកាន់កូរ៉េខាងជើងថាបានរំលោភបំពានការរឹតបន្តឹងរបស់អន្តរជាតិលើកម្មវិធីមីស៊ីល។
ថ្មីៗនេះ អាមេរិក និងកូរ៉េខាងត្បូងបានបន្តធ្វើសមយុទ្ធរួមគ្នាទ្រង់ទ្រាយធំឡើងវិញ បន្ទាប់ពីសកម្មភាពនេះត្រូវបានផ្អាកនៅឆ្នាំ២០១៧ ដែលជាផ្នែកមួយនៃកិច្ចខិតខំប្រឹងប្រែងកាត់បន្ថយភាពតានតឹងក្នុងតំបន់។ ទីក្រុងសេអ៊ូលបានប្រកាសថា កិច្ចព្រមព្រៀងក្នុងឆ្នាំ២០១៨ ស្តីអំពីការផ្អាកសមយុទ្ធយោធានៅតាមព្រំដែនគឺទុកជាមោឃៈ បន្ទាប់ពីក្រុងព្យុងយ៉ាងបាញ់សាកល្បងកាំភ្លើងធំរបស់ខ្លួន៕
ប្រភព RT ចុះផ្សាយថ្ងៃទី២៤ ខែមករា ឆ្នាំ២០២៤
បកប្រែដោយ ឱក សុវណ្ណារ័ត្ន
