ស្លាប់មន្ត្រីសន្តិសុខ៩នាក់ របួស៨នាក់ក្នុងហេតុការណ៍ផ្ទុះនៅភាគពាយ័ព្យប៉ាគីស្ថាន

ប្រទេសប៉ាគីស្ថាន៖ យ៉ាងហោចណាស់មន្ត្រីសន្តិសុខ៩នាក់ត្រូវបានសម្លាប់ និង៨នាក់ផ្សេងទៀតរងរបួសក្នុងការបំផ្ទុះគ្រាប់បែកកែច្នៃ (IED)​ នៅខេត្តខាយប័រ ផាកថុនវ៉ា ភាគពាយ័ព្យប្រទេសប៉ាគីស្ថានកាលពីថ្ងៃចន្ទ នេះបើយោងតាមមន្ត្រីសន្តិសុខ។

មន្ត្រីសន្តិសុខបាននិយាយកាលពីថ្ងៃចន្ទថា ឧបទ្ទវហេតុនេះកើតឡើងបន្ទាប់ពីក្បួនរថយន្តរបស់កងកម្លាំងសន្តិសុខរងការប៉ះទង្គិចពីការបំផ្ទុះគ្រាប់បែកកែច្នៃនៅតំបន់មូឡា ខាន សារ៉ាយ ក្នុងស្រុកវ៉ារីស្ថានខាងត្បូង។

ប៉ូលិស កងកម្លាំងសន្តិសុខ និងក្រុមសង្គ្រោះ បានប្រញាប់ប្រញាល់ទៅទីតាំងកើតហេតុភ្លាមៗ បន្ទាប់ពីការបំផ្ទុះ ហើយបានបញ្ជូនអ្នករបួសទៅមន្ទីពេទ្យក្នុងតំបន់នោះ។

ប៉ូលិសបានរាយខ្សែរង្វង់សុវត្ថិភាពបិទចំនុចកើតហេតុ ហើយបើកប្រតិបត្តិការរុករកនៅជុំវិញតំបន់នោះដើម្បីតាមចាប់ជនល្មើស។

ពុំទាន់មានក្រុមឬបុគ្គលណាមួយអះអាងទទួលខុសត្រូវចំពោះការវាយប្រហារនេះនៅឡើយទេ៕