ប្រទេសលីបង់៖ សមាជិកក្រុមហេបូឡា២នាក់ត្រូវបានសម្លាប់ និងម្នាក់ផ្សេងទៀតរងរបួសកាលពីថ្ងៃអង្គារក្នុងការវាយប្រហារតាមអាកាសរបស់អ៊ីស្រាអែលចំនួន២លើកនៅភាគខាងត្បូងប្រទេសលីបង់ នេះបើតាមក្រសួងសុខាភិបាលលីបង់ និងកងទ័ពការពារជាតិអ៊ីស្រាអែល (IDF)។
មជ្ឈមណ្ឌលប្រតិបត្តិការសង្គ្រោះបន្ទាន់ដែលមានទំនាក់ទំនងជាមួយក្រសួងសុខាភិបាលបាននិយាយនៅក្នុងសេចក្តីថ្លែងការណ៍មួយថា យន្តហោះគ្មានមនុស្សបើករបស់អ៊ីស្រាអែលបានវាយប្រហារលើទីក្រុងឌៀអាម៉េស ក្នុងស្រុកថាយ បណ្តាលឱ្យមនុស្សម្នាក់ស្លាប់ និងម្នាក់ទៀតរងរបួស។ ចំណែកឯការវាយប្រហារតាមផ្លូវអាកាសដាច់ដោយឡែកមួយផ្សេងទៀតទៅលើម៉ាស៊ីនឈូសដីមួយគ្រឿងនៅក្នុងតំបន់វ៉ាឌី ម៉ារីយ៉ាមីន ខាងលិចភូមិយ៉ាទ័រ បណ្តាលឱ្យមនុស្សម្នាក់ស្លាប់។
ប្រភពសន្តិសុខលីបង់បានកំណត់អត្តសញ្ញាណជនរងគ្រោះក្នុងការវាយប្រហារនៅទីក្រុងឌៀអាម៉េស ថាជាមន្ត្រី “ទំនាក់ទំនង” ក្រុមហេបូឡាក្នុងតំបន់ លោក ម៉ាមួដ អ៊ីសា ហើយអ្នកដែលស្លាប់នៅក្នុងភូមិយ៉ាទ័រ ជាសមាជិកហេបូឡាលោក អាលី កាដឌូ។ មិនមានព័ត៌មានលម្អិតបន្ថែមក្រៅពីនេះទេ។
នៅក្នុងសេចក្តីថ្លែងការណ៍មួយកាលពីថ្ងៃអង្គារ IDF បាននិយាយថា កងកម្លាំងអាកាសរបស់ខ្លួនបានវាយប្រហារ និងសម្លាប់ពួកសកម្មប្រយុទ្ធហេបូឡា២នាក់នៅភាគខាងត្បូងប្រទេសលីបង់។
យោងតាមសេចក្តីថ្លែងការណ៍បានឲ្យដឹងថា ម្នាក់ក្នុងចំណោមអ្នកសកម្មប្រយុទ្ធដែលស្លាប់ គឺលោក ម៉ាមួដ អ៊ីសា បម្រើការជាអ្នកតំណាងក្នុងតំបន់របស់ក្រុមហេបូឡា នៅក្នុងភូមិកាហ្វ្រាក្បែរនោះ ហើយគាត់ទទួលខុសត្រូវលើផ្នែកហិរញ្ញវត្ថុ និងការទំនាក់ទំនងរបស់យោធារវាងក្រុមហេបូឡា និងអ្នកភូមិ។ លើសពីនេះទៅទៀត គាត់ត្រូវបានគេចោទប្រកាន់ដោយគ្មានមូលដ្ឋានថាបានធ្វើប្រតិបត្តិការរឹបអូសទ្រព្យសម្បត្តិឯកជនសម្រាប់ការប្រើប្រាស់ក្នុងប្រតិបត្តិការរបស់អ្នកសកម្មប្រយុទ្ធ ដែលមានដូចជាការជួលផ្ទះដើម្បីរក្សាទុកអាវុធ និងធ្វើសកម្មភាពឃ្លាំមើលជាដើម។
ក្នុងសេចក្តីថ្លែងការណ៍ដដែលបានបង្ហាញថា អ្នកសកម្មប្រយុទ្ធម្នាក់ផ្សេងទៀតដែលមិនត្រូវបានបញ្ចេញឈ្មោះ ត្រូវបានសម្លាប់ក្នុងពេលបើកបរយានជំនិះវិស្វកម្មនៅក្នុងតំបន់ហ្សីបគីន ភាគខាងត្បូងប្រទេសលីបង់ ដោយអះអាងថាគាត់កំពុងព្យាយាមរៀបចំការដ្ឋានហេដ្ឋារចនាសម្ព័ន្ធអ្នកសកម្មប្រយុទ្ធហេបូឡាឡើងវិញ។
IDF និយាយថា សកម្មភាពរបស់អ្នកសកម្មប្រយុទ្ធទាំង២នាក់នេះ បានបង្កើតការរំលោភលើការយោគយល់គ្នារវាងអ៊ីស្រាអែល និងលីបង់។
បទឈប់បាញ់រវាងក្រុមហេបូឡានិងអ៊ីស្រាអែលដែលសម្របសម្រួលដោយសហរដ្ឋអាមេរិក និងបារាំង បានចូលជាធរមានចាប់តាំងពីថ្ងៃទី២៧ ខែវិច្ឆិកា ឆ្នាំ២០២៤ ដោយបញ្ចប់ការប៉ះទង្គិចគ្នាឆ្លងព្រំដែនជាច្រើនខែ បានផ្ទុះឡើងបន្ទាប់ពីសង្គ្រាមហ្កាហ្សាចាប់ផ្តើម។
ប៉ុន្តែ ទោះបីជាមានបទឈប់បាញ់ក៏ដោយ ក៏កងទ័ពអ៊ីស្រាអែលនៅតែបើកការវាយប្រហារតាមអាកាសម្តងម្កាលទៅលើប្រទេសលីបង់ ដោយអះអាងថាសំដៅទៅលើការគំរាមកំហែងរបស់ក្រុមហេបូឡា ដោយបន្តរក្សាទុកកងកម្លាំងឈជើងនៅទីតាំងចំនួន៥តាមបណ្តោយព្រំដែនប្រទេសលីបង់ក្រោយពេលកំណត់ក្នុងការដកកងកម្លាំងទាំងស្រុងត្រឹមថ្ងៃទី១៨ ខែកុម្ភៈ ផុតកំណត់៕
