ប្រភពព័ត៌មានពី USA Today ចេញផ្សាយថ្ងៃទី ៣១ ខែ មករា ឆ្នាំ ២០១៦
យ៉ាងហោចណាស់មនុស្ស ៥០នាក់ត្រូវបានសម្លាប់នៅថ្ងៃអាទិត្យ នៅក្នុងការបំផ្ទុះគ្រាប់បែកអត្តឃាតមួយនៅជិតរដ្ឋធានីស៊ីរីក្នុងក្រុងដាម៉ាស់ចំពេលដែលបេសកជនពិសេសរបស់អង្គការសហប្រជាជាតិចាប់ផ្តើមចរចាសន្តិភាពដើម្បីបញ្ចប់សង្គ្រាមស៊ីវិលរបស់ប្រទេសនេះ។ ការបំផ្ទុះគ្រាប់បែកនេះ រដ្ឋអ៊ីស្លាមបានអះអាងថាខ្លួនជាអ្នករៀបចំឡើងហើយពួកគេបានគូសបញ្ជាក់ថាវាមានភាពលំបាកណាស់ក្នុងការស្វែងរកដំណោះស្រាយនយោបាយទៅលើសង្រ្គាមដែលមានរយៈពេលរហូតដល់ជិតខួបលើកទីប្រាំរបស់ពួកគេ។ បើយោងតាម SANA ដែលជាទីភ្នាក់ងារសារពត៌មានរដ្ឋរបស់ស៊ីរីបានឲ្យដឹងថាអ្នកវាយប្រហារបានបំផ្ទុះគ្រាប់បែកក្នុងរថយន្តនៅឯចំណតរថយន្ដក្រុងមួយ ហើយអ្នកបំផ្ទុះគ្រាប់បែកអត្តឃាតពីរនាក់ទៀតបំផ្ទុះគ្រឿងផ្ទុះជាច្រើនទៀតខណៈដែលអ្នកជួយសង្គ្រោះប្រញាប់ប្រញាល់ទៅកាន់តំបន់នោះ។ ហេតុការណ៍ផ្ទុះនេះកើតឡើងនៅឯជាយក្រុងដាម៉ាស់នៃតំបន់ Sayyida Zeinab ដែលមានប្រវែងប្រហែល ៦០០យ៉ាតពីកន្លែងទីសក្ការៈបូជាមួយនៃនិកាយស៊ីអ៊ីត។ ក្រសួងការបរទេសស៊ីរីបាននិយាយថាមនុស្សជាង ១០០នាក់បានរងរបួសបន្ថែមលើចំនួន ៥០នាក់ដែលបានសម្លាប់។ Associated Press បានរាយការណ៍ពីរូបភាពទូរទស្សន៍ឲ្យឃើញពីការខូចខាតដែលរួមបញ្ចូលទាំងរថយន្តឆេះ ថែមទាំងការផ្ទុះឡើងចេញពីបង្អួច និងរន្ធធំៗនៅក្នុងអគារផ្ទះល្វែងដែលនៅក្បែរនោះ។ គេហទំព័ររដ្ឋអ៊ីស្លាមមួយដែលស្គាល់ថាជាប់ទាក់ទងនឹងក្រុម ISIL ឬ ISIS បានសរសេរថាការវាយប្រហារនេះគឺធ្វើឡើងដោយសមាជិកនៃក្រុមជ្រុលនិយមដែលគ្រប់គ្រងតំបន់ធំទាំងពីរក្នុងប្រទេសស៊ីរី និងអ៊ីរ៉ាក់។
