ប្រភពព័ត៌មានពី USA Today ចេញផ្សាយថ្ងៃទី ២០ ខែ មីនា ឆ្នាំ ២០១៦
មន្ត្រីបែលហ្ស៊ិកម្នាក់បាននិយាយកាលពីថ្ងៃអាទិត្យនេះថាជនជាប់ចោទពីបទធ្វើភេរវកម្ម លោក Salah Abdeslam ដែលសង្ស័យថាបានរៀបចំគម្រោងវាយប្រហារនៅទីក្រុងប៉ារីសដែលសម្លាប់មនុស្ស ១៣០នាក់ ហើយភេរវកររូបនេះប្រាប់អ្នកស៊ើបអង្កេតថារូបគេកំពុងរៀបចំគម្រោងវាយប្រហារធំមួយទៀតនៅពេលដែលរូបគេត្រូវចាប់ខ្លួននៅជាយក្រុងទីក្រុងព្រុយសែលនៅសប្តាហ៍មុន។ រដ្ឋមន្រ្តីការបរទេស លោក Didier Reynders បានមានប្រសាសន៍នៅទីក្រុងព្រុចសែលក្នុងវេទិកាមួយស្តីពីការប្រឆាំងអំពើភេរវកម្មថាវាអាចក្លាយជាការពិតដោយសារតែយើងបានរកឃើញអាវុធធុនតូច និងអាវុធធុនធ្ងន់ជាច្រើននៅក្នុងការស៊ើបអង្កេតជាលើកដំបូង ហើយយើងរកឃើញបណ្តាញថ្មីមួយនៅជុំវិញគាត់នៅក្នុងទីក្រុងព្រុចសែល។ លោកបានបន្ថែមថាអាជ្ញាធរបានរកឃើញជនសង្ស័យរាប់សិបនាក់ ហើយគេជឿជាក់ថានៅមានជនសង្ស័យជាច្រើននាក់ផ្សេងទៀតផងដែរ។ ប៉ូលីស INTERLPOL ព្រមានថាការចាប់ខ្លួនលោក Abdeslam ប្រហែលជាជម្រុញឲ្យអ្នកសមគំនិតផ្សេងទៀតធ្វើការគេចខ្លួនពីអឺរ៉ុបឬនៅកន្លែងផ្សេងទៀត។ ទីភ្នាក់ងារប៉ូលីសអន្តរជាតិបានណែនាំឲ្យមានការប្រុងប្រយ័ត្នបន្ថែមទៀតនៅច្រកព្រំដែនសម្រាប់ប្រទេសជាសមាជិក ១៩០របស់ខ្លួន។ គួរបញ្ជាក់ផងដែរថា លោក Abdeslam មានអាយុ ២៦ ឆ្នាំត្រូវចាប់ខ្លួនយកទៅឃុំឃាំងដោយនគរបាលកាលពីថ្ងៃសុក្រកន្លងនេះនៅក្នុងផ្ទះរបស់គាត់។ លោក Francois Molins ព្រះរាជអាជ្ញានៅទីក្រុងប៉ារីសបានថ្លែងថាលោក Abdeslam ប្រាប់អាជ្ញាធរបែលហ្ស៊ិកថារូបលោកមានការជាប់ពាក់ព័ន្ធក្នុងការវាយប្រហារកាលពីថ្ងៃទី១៣ ខែវិច្ឆិកាកន្លងទៅនៅទីក្រុងប៉ារីស។ លោក Molins បានបន្តទៀតថាលោក Abdeslam និយាយថារូបលោកបញ្ជូនអ្នកវាយប្រហារដ៏ទៃទៀតមុនពេលដែលគាត់កំពុងផ្លាស់ប្តូរគំនិតដោយបានបោះបង់អាវអត្តឃាតផ្ទាល់ខ្លួនរបស់គាត់ និងរត់គេចខ្លួនត្រឡប់ទៅបែលហ្ស៊ិកវិញ។
