ភេរវកម្មក្នុងទីក្រុងព្រុសសែល៖ ជនសង្ស័យទាំង៣ ត្រូវបានកំណត់អត្តសញ្ញាណ

ប្រភពព័ត៌មានពី​ RT ចេញផ្សាយថ្ងៃទី ២៣ ខែ មីនា ឆ្នាំ ២០១៦

ប៉ូលីសប្រទេសបែលហ្ស៊ិកបានអោយដឹងថាជនបំផ្ទុះគ្រាប់បែកអត្តឃាតដែលថតជាប់ក្នុងកាមេរ៉ាវីដេអូសុវត្ថិភាព CCTV នៅព្រលានយន្តហោះទីក្រុងព្រុសសែលគឺជាបងប្អូនគ្នា ក្នុងនោះមានលោក Khalid និង Brahim El Bakouri ដែលអ្នកទាំង២ ជាប្រជាពលរដ្ឋរស់នៅក្នុងទីក្រុងនេះ ហើយក៏មានទំនាក់ទំនងជាមួយនឹងជនសង្ស័យដែលវាយប្រហារនៅទីក្រុងប៉ារីស Salah Abdeslam ផងដែរ។ បងប្អូនទាំង ២នាក់នេះ និងជនសង្ស័យម្នាក់ទៀតដែលជឿថាមានឈ្មោះ Najim Laachraoui អាយុ ២៥ឆ្នាំត្រូវបានថតជាប់ដោយកាមេរ៉ាវីដេអូសុវត្ថិភាព CCTV មុនពេលមានការផ្ទុះកើតឡើង។ បុរសឈ្មោះ Laachraoui ត្រូវបានគេសង្ស័យថាជាអ្នកបង្កប់គ្រាប់បែក នេះបើយោងតាមកាសែត DH ប្រទេសបែលហ្ស៊ិក។​ បច្ចុប្បន្នរបាយការណ៍បង្ហាញថាបុរសឈ្មោះ Brahim ជាជនបំផ្ទុះគ្រាប់បែកនៅព្រលានយន្តហោះ ខណៈដែល Khalid ជាជននៅពីក្រោយការវាយប្រហារផ្លូវក្រោមដី។ យោងតាមប្រភពផ្សព្វផ្សាយក្នុងស្រុក ផ្ទះល្វែងមួយកន្លែងដែលជួលដោយជនសង្ស័យ Kalid El Bakroui ដោយប្រើប្រាស់ឈ្មោះក្លែងក្លាយនោះ ត្រូវបានវាយឆ្មក់ដោយប៉ូលីសកាលពីសប្តាហ៍មុន។ ការវាយឆ្មក់នេះបានរកឃើញអាវុធ និងទង់ជាតិក្រុមឧទ្ទាមរដ្ឋអ៊ីស្លាម IS និងស្នាមម្រាមដៃរបស់ជនសង្ស័យSalah Abdeslam ដែលត្រូវបានឃុំខ្លួន ៣ថ្ងៃក្រោយមកនោះ។