ជនជាតិអូស្ដ្រាលីជាង១០០នាក់កំពុងចូលរួមជាមួយក្រុមរដ្ឋអ៊ីស្លាម ប្រយុទ្ធនៅតំបន់មជ្ឈិមបូព៌ា អាចជាប្រជាជនអូស្ដ្រាលីលើកដំបូង ដែលត្រូវលុបចោលលិខិតឆ្លងដែនរបស់ពួកគេមិនឲ្យប្រើប្រាស់បានឡើយ ស្ថិតក្រោមច្បាប់អនុម័តដោយរដ្ឋាភិបាលកាលពីឆ្នាំមុន។មិនតែប៉ុណ្ណោះ ប្រជាជនអូស្ដ្រាលីទាំងនោះក៏ត្រូវប្រឈមការដកហូតសញ្ជាតិអូស្ដ្រាលីបន្ថែមទៀត បើរកឃើញថាបានរួមដៃជាមួយក្រុមរដ្ឋអ៊ីស្លាមពិតប្រាកដមែន។
លោករដ្ឋមន្ដ្រីក្រសួងអន្ដោប្រវេសន៍អូស្ដ្រាលីPeter Dutton បានបញ្ជាក់នៅថ្ងៃទី០៨មេសានេះថា ក្រុមប្រឹក្សាភិបាលធ្វើការលើការដកហូតសិទ្ធិជាពលរដ្ឋ បានបញ្ជាក់ថាមានជនជាតិអូស្ដ្រាលី១១០នាក់ កំពុងប្រយុទ្ធនៅក្នុងតំបន់មជ្ឈិមបូព៌ា ហើយពួកគេទាំងនោះនឹងត្រូវដកហូតសញ្ជាតិប្រសិនបើរកឃើញថា បានចូលរួមជាមួយក្រុមអង្គការរដ្ឋអ៊ីស្លាមពិតប្រាកដមែន។
លោករដ្ឋមន្ដ្រីបាននិយាយទៀតថា ទាំងការលុបចោលលិខិតឆ្លងដែន និងការដកហូតសញ្ជាតិ អូស្ដ្រាលី ត្រូវធ្វើទៅលើបុគ្គលនីមួយៗដោយប្រុងប្រយ័ត្នបំផុត។ដូច្នេះអ្នកដែលបង្កហានិភ័យដល់ប្រជាជនអូស្ដ្រាលី អ្នកនោះនឹងត្រូវដកហូតសញ្ជាតិដំបូងគេ ហើយអាចមានបុគ្គលច្រើនជាង១០០នាក់។កងកម្លាំងស៊ើបអង្កេតពិសេសបានរាយការណ៍ថា រដ្ឋាភិបាលអាចលុបចោលលិខិតឆ្លងដែន និងដកសិទ្ធិជាពលរដ្ឋរបស់ក្រុមជីហាដក្នុងរយៈពេលបីខែទៀត។
គួរបញ្ជាក់ថា វិធានការថ្មីរបស់អូស្ដ្រាលីត្រូវបានណែនាំដោយរដ្ឋាភិបាល ហើយវិធានការថ្មីនេះទៀតសោត ប្រជាជនអូស្ដ្រាលីដែលមានសញ្ជាតិពីរ ធ្វើដំណើរទៅតំបន់ក្ដៅគគុកពោរពេញដោយភេរវកម្ម បើរកឃើញថាបានគាំទ្រក្រុមភេរវករ នោះពួកគេនឹងត្រូវដកហូតសញ្ជាតិអូស្ដ្រាលី។រដ្ឋាភិបាលក៏ជឿជាក់ថាប្រជាជនអូស្ដ្រាលី ទៅចុះចូលជាមួយក្រុមរដ្ឋអ៊ីស្លាម មានសញ្ជាតិពីររួចទៅហើយ អ្នកខ្លះមានសញ្ជាតិល៊ីបង់ អ៊ីរ៉ាក់ អេហ្ស៊ីប និងអាចមានអង់គ្លេសបន្ថែមទៀត៕
