ប្រភពព័ត៌មានពី IraqiNews ចេញផ្សាយថ្ងៃទី០៤ ខែវិច្ឆិកា ឆ្នាំ២០១៨
មេប៉ូលិសម្នាក់បាននិយាយថាជនអ៊ីរ៉ាក់៥នាក់ដែលក្នុងនោះមានសិស្សសាលា៣នាក់បានរងរបួសកាលពីថ្ងៃអាទិត្យនេះនៅក្នុងហេតុការបំផ្ទុះគ្រាប់បែកក្នុងរថយន្តស្ថិតនៅជិតសាលារៀនមួយក្នុងសង្កាត់ al-Shirqat ខេត្ត Salahuddin ។
មេបញ្ជាការប៉ូលិសខេត្តលោកឧត្តមសេនីយ៍ Majid al-Ghatran បានប្រាប់គេហទំព័រព័ត៌មានMawazin ថារថយន្ដដែលដាក់គ្រាប់បែកបង្កៃបានផ្ទុះឡើងនៅជិតសាលាបឋមសិក្សាal-Shirqat ធ្វើឲ្យសិស្សសាលា៣នាក់ និងបុរសសន្តិសុខ២នាក់ទៀតរងរបួស។ លោកបានប្រាប់ឲ្យដឹងទៀតថាកាមេរ៉ាសុវត្ថិភាពបានបង្ហាញបុរស់ម្នាក់ពាក់ម៉ាស់ហើយស្លៀកពាក់ឯកសណ្ឋានយោធា និងបានចតឡានរបស់គាត់នៅជិតរបងសាលា បន្ទាប់មកប្រហែលមួយម៉ោងកន្លះរថយន្តនោះក៏បានផ្ទុះឡើងបណ្តាលឲ្យអគារសាលាមានការខូចខាត់យ៉ាងធ្ងន់ធ្ងរនៅផ្នែកខាងមុខ។
គួរបញ្ជាក់ថាអំពើហិង្សាក្នុងប្រទេសនេះបានកើនឡើងបន្ថែមទៀតជាមួយការកើតមានឡើងនៃក្រុមសកម្មប្រយុទ្ធជ្រុលនិយមរដ្ឋអ៊ីស្លាមដែលបានប្រកាសរដ្ឋអ៊ីស្លាមរបស់ពួកគេក្នុងប្រទេសអ៊ីរ៉ាក់ និងស៊ីរីកាលពីឆ្នាំ២០១៤។ ការកើនឡើងនៃអំពើហិង្សារវាងក្រុមប្រដាប់អាវុធ និងកងកម្លាំងរដ្ឋាភិបាលបានបណ្តាលឲ្យមនុស្សជាង៥លាននាក់បានផ្លាស់ទីលំនៅ នៅទូទាំងប្រទេសអ៊ីរ៉ាក់ និងបណ្តាលឲ្យមនុស្សជាង១១លាននាក់ត្រូវការជំនួយមនុស្ស នេះបើយោងតាមមន្ត្រីអង្គការសហប្រជាជាតិសម្រាប់ការងារសម្របសម្រួលកិច្ចការមនុស្សធម៌។
គួរំលឹកថាអង្គការសហប្រជាជាតិបាននិយាយកាលពីព្រឹកថ្ងៃសុក្រនេះថាអំពើហិង្សាបានបណ្តាលឲ្យមនុស្សស្លាប់ និងរងរបួស១៧៤នាក់នៅទូទាំងប្រទេសអ៊ីរ៉ាក់នៅក្នុងខែតុលា ខណៈដែលប្រទេសនេះកំពុងព្យាយាមស្តារឡើងវិញពីក្រុមសកម្មប្រយុទ្ធរដ្ឋអ៊ីស្លាមអស់រយៈពេល៤ឆ្នាំ។
