ប្រភពព័ត៌មានពី RT ចេញផ្សាយថ្ងៃទី២១ ខែមករា ឆ្នាំ២០១៩
ក្រុមសកម្មប្រយុទ្ធតាលីបង់សម្លាប់សមាជិកកងកម្លាំងអាហ្វហ្គានីស្ថានច្រើនជាង១០០នាក់ក្នុងការវាយប្រហារលើបរិវេណយោធាមួយនៅកណ្តាលខេត្ត Maidan Wardak នេះបើយោងតាមភ្នាក់ងារព័ត៌មាន Reuters រាយការណ៍ដកស្រង់ចេញពីប្រភពយោធា។
មន្ត្រីម្នាក់ប្រាប់ភ្នាក់ងាររ៉យទ័រថា ” មនុស្សចំនួន១២៦នាក់ស្លាប់ក្នុងការផ្ទុះមួយនៅមជ្ឈមណ្ឌលហ្វឹកហ្វឺនយោធា”។ រដ្ឋាភិបាលមានប្រសាសន៍មុននេះថា មនុស្សចំនួន១២នាក់ត្រូវសម្លាប់ ប៉ុន្តែក្រោយមកប្រភពបដិសេធមិនធ្វើអត្ថាធិប្បាយបន្ថែម។
អ្នកបំផ្ទុះគ្រាប់បែកអត្តឃាតនៅប្រទេសអាហ្វហ្គានីស្ថានរាយការណ៍ថា អ្នកបំផ្ទុះគ្រាប់បែកអត្តឃាតតាលីបង់បើករថយន្តបំផ្ទុះគ្រាប់បែកក្នុងមូលដ្ឋាន ក្រោយពីមានការប្រយុទ្ធគ្នារវាងក្រុមសកម្មប្រយុទ្ធ និងកងកម្លាំងសន្តិសុខ។ ការវាយប្រហារនេះកើតឡើងនៅវេលាម៉ោង៨ព្រឹកក្នុងស្រុកនៅថ្ងៃចន្ទ។
អ្នកនាំពាក្យក្រុមតាលីបង់លោក Zabihullah Mujahid អះអាងទទួលខុសត្រូវចំពោះការវាយប្រហារនេះដោយបង្ហាញលើបណ្តាញ Twitter ថារថយន្តដែលផ្ទុកគ្រឿងផ្ទុះបំផ្លាញមូលដ្ឋានទាំងស្រុង និងកប់មនុស្សក្រោមគំនរថ្ម។ ខ្សែវីដេអូវីដេអូបង្ហាញថា អគារនៅបរិវេណនោះបាក់ និងឆេះ។ លោកប្រធានាធិបតីអាមេរិកត្រាំប្រកាសដកកងកម្លាំងសហរដ្ឋអាមេរិកចេញពី ប្រទេសអាហ្វហ្គានីស្ថាននៅខែមុនដោយមិនកំណត់ពេល។
កងកម្លាំងសហរដ្ឋអាមេរិកប្រយុទ្ធជាមួយពួកតាលីបង់នៅប្រទេសអាហ្វហ្គានីស្ថានចាប់តាំងពីឆ្នាំ២០០១ ហើយជម្លោះនេះជំរុញឱ្យពួកសកម្មប្រយុទ្ធធ្វើសកម្មភាពក្នុងរយៈពេលប៉ុន្មានខែថ្មីៗនេះ។ ក្រុមនោះគ្រប់គ្រង ឬបង្កើតឥទ្ធិពលនៅជុំវិញស្រុករបស់ប្រទេសនេះ ជាមួយស្ថានភាពប្រែប្រួលពីមួយខែទៅមួយខែ។
មេបញ្ជាការអង្គការណាតូនៅប្រទេសអាហ្វហ្គានីស្ថាន លោកឧត្ដមសេនីយ៍ Austin Scott Miller មានប្រសាសន៍នៅចុងឆ្នាំថា ពួកតាលីបង់នឹងមិនត្រូវចាញ់ ហើយលោកបន្ថែមថា ប្រទេសនេះត្រូវការដំណោះស្រាយនយោបាយ។ ទន្ទឹមនឹងនេះ ពួកសកម្មប្រយុទ្ធ តាលីបង់បន្តយុទ្ធនាការវាយប្រហារ និងបំផ្ទុះគ្រាប់បែកអត្តឃាតប្រឆាំងនឹងកងកម្លាំងរដ្ឋាភិបាលអាមេរិក និងអាហ្វហ្គានីស្ថាន។
គ្រាប់បែកបំផ្ទុះរថយន្តតាលីបង់មួយគ្រឿងសំដៅទៅលើក្បួនរថយន្តដឹកអភិបាលខេត្ត Logar នៅថ្ងៃអាទិត្យ។ ហេតុការណ៍នោះសម្លាប់មន្ត្រីសន្តិសុខចំនួន៨ នាក់ ប៉ុន្តែអភិបាលចាកចេញដោយមិនមានទទួលរងរបួស។ នៅរយៈពេលមួយសប្តាហ៍មុន រថយន្តបំផ្ទុះគ្រាប់បែកមួយទៀតសម្លាប់មនុស្សយ៉ាងតិចចំនួន៤ នាក់ និងបង្ករឱ្យមនុស្សចំនួន៩០ នាក់រងរបួសនៅក្រុងកាប៊ុល។ នៅដើមខែនេះ កងកម្លាំងអាហ្វហ្គានីស្ថាន និងជនស៊ីវិលមានចំនួនច្រើនជាង៣០ នាក់ត្រូវគេសម្លាប់ក្នុងការវាយឆ្មក់នៅភាគ ពាយ័ព្យនៃខេត្ត Badghis និទម្លាក់គ្រាប់បែកលើទីផ្សារនៅខេត្ត Paktika ។ពួកតាលីបង់បដិសេធមិនព្រមធ្វើកិច្ចចរចាសន្តិភាពជាមួយសហរដ្ឋអាមេរិកនៅដើមខែនេះ ដោយបដិសេធមិនព្រមបញ្ចូលរដ្ឋាភិបាលអាហ្វហ្គានីស្ថាន(ពួកគេហៅថាជារដ្ឋាភិបាលអាយ៉ង)នៅក្នុងកិច្ចពិភាក្សានេះ។ ទោះយ៉ាងណាក៏ដោយនៅប៉ុន្មានម៉ោងក្រោយពីការវាយប្រហារនៅ Maidan Wardak នៅថ្ងៃចន្ទ ពួកសកម្មប្រយុទ្ធប្រកាសលើ Twitter ថា កិច្ចចរចាជាមួយមន្ត្រីអាមេរិកនៅកាតាចាប់ផ្តើមឡើងវិញ។
