ប្រភពព័ត៌មានពី TASS ចេញផ្សាយថ្ងៃទី២៤ ខែមករា ឆ្នាំ២០១៩
យ៉ាងហោចណាស់មានមនុស្សចំនួន១៦នាក់ស្លាប់ក្នុងការប៉ះទង្គិចគ្នាអំឡុងពេលមានបាតុកម្មប្រឆាំងរដ្ឋាភិបាលនៅប្រទេសវ៉េណេស៊ុយអេឡានៅថ្ងៃពុធ។
យោងតាមប្រភពដដែលបង្ហាញថា ក្រុមអ្នកតវ៉ាប៉ះទង្គិចជាមួយកងកម្លាំងសន្តិសុខហើយបង្ករឱ្យមនុស្សចំនួន១៦នាក់ស្លាប់ មាននៅរដ្ឋ Amazonas, Barinas, Bolivar, Portuguesa និង Tachira ក៏ដូចជានៅរដ្ឋធានី Caracas ។ បាតុកម្មទ្រង់ទ្រាយធំប្រឆាំងនឹងប្រធានាធិបតី Nicolas Maduro រៀបចំឡើងនៅតំបន់ជាច្រើនក្នុងប្រទេស។
នៅថ្ងៃពុធលោក Juan Guaido អ្នកនាំពាក្យសភាជាតិវ៉េណេស៊ុយអេឡាប្រកាសខ្លួនឯងជាប្រធានាធិបតីស្តីទីដែលមានបណ្តាប្រទេសជាច្រើនទទួលស្គាល់លោកថាជាប្រធានាធិបតីបណ្តោះអាសន្នរួមមានប្រទេសអាហ្សង់ទីន ប្រេស៊ីល ហ្គាតេម៉ាឡា កាណាដា កូឡុំប៊ី កូស្តារីកា ប៉ារ៉ាហ្គាយ ប៉េរូ អាមេរិក ឆីលនិងអេកាឌ័រ។
លោកប្រធានាធិបតីវ៉េណេស៊ុយអេឡា Nicolas Maduro ចាត់ទុកការធ្វើរដ្ឋប្រហារនោះ ជាការរៀបចំដោយក្រុងវ៉ាស៊ីនតោន ហើយលោកប្រកាសបំបែកទំនាក់ទំនងការទូតជាមួយសហរដ្ឋអាមេរិក។
