ប្រភពព័ត៌មានពី RT ផ្សាយថ្ងៃទី២២ ខែកក្កដា ឆ្នាំ២០១៩
នៅថ្ងៃចន្ទនេះសម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជាបដិសេធថា មិនបានអនុញ្ញាតឱ្យប្រទេសចិនបង្កើតទីបញ្ជាការយោធាក្នុងប្រទេសអាស៊ីអាគ្នេយ៍នោះទេ។ យោងរបាយការណ៍ព័ត៌មានមួយលើកឡើងថា ប្រទេសទាំងពីរចុះហត្ថលេខាលើកិច្ចព្រមព្រៀងសម្ងាត់មួយដែលអនុញ្ញាតឱ្យក្រុងប៉េកាំងប្រើប្រាស់មូលដ្ឋានកងទ័ពជើងទឹកនៅឈូងសមុទ្រថៃ។ សម្តេចតេជោ ហ៊ុន សែន ប្រាប់គេហទំព័រ Fresh News ថា របាយការណ៍ដែលកាសែត The Wall Street Journal បង្កើតឡើងគឺជាព័ត៌មានមិនត្រឹមត្រូវ ហើយលោកអះអាងថាកម្ពុជាមិនដែលបានពិភាក្សាជាមួយប្រទេសចិនដើម្បីបង្កើតមូលដ្ឋានទ័ពនោះទេ។ ភ្នាក់ងារព័ត៌មាន AP ដកស្រង់ប្រសាសន៍របស់សម្តេច ថា “ពុំមានរឿងហ្នឹងកើតឡើងទេ។ ការបង្កើតមូលដ្ឋានយោធាបរទេសគឺជាការប្រឆាំងនឹងរដ្ឋធម្មនុញ្ញរបស់ប្រទេសកម្ពុជា”។ គួររំលឹកផងដែរថា ប្រទេសចិនគឺជាអ្នកវិនិយោគទុនដ៏ធំជាងគេ និងជាដៃគូនយោបាយដ៏ជិតស្និទ្ធរបស់កម្ពុជា៕