ប្រភពព័ត៌មានពី RT ផ្សាយថ្ងៃទី២៣ ខែកក្កដា ឆ្នាំ២០១៩
ភ្នាក់ងារ AP រាយការណ៍ថា កម្លាំងសន្តិសុខអ៊ីរ៉ាក់កំពុងសំអាតភូមិ និងដីស្រែចំការនៅភាគខាងជើងទីក្រុងបាកដាដដែលនៅសេសសល់ពីរដ្ឋអ៊ីស្លាម (IS អតីត ISIS/ISIL)។ ក្រុមទាហានជើងគោកស្វែងរកឃ្លាំងអាវុធ និងគ្រាប់បែកនៅលើដីកសិកម្មក្នុងភូមិថារ៉ាមីយ៉ាសនៅថ្ងៃអង្គារ។ តំបន់នោះមានចម្ងាយប្រមាណជា៥០គីឡូម៉ែត្រភាគខាងជើងទីក្រុងបាកដាដ។ ចលនានេះគឺជាផ្នែកមួយនៃប្រតិបត្ដិការមានឈ្មោះថា “Will to Victory” ចាប់ផ្តើមនៅរយៈពេលពីរ សប្តាហ៍កន្លងទៅនៅតាមបណ្តោយព្រំដែនជាមួយប្រទេសស៊ីរី។ ការងារនេះត្រូវបានពង្រីកនៅសប្ដាហ៍មុនទៅដល់តំបន់ភាគខាងជើងនៃទីក្រុងបាកដាដ និងនៅខេត្តឌីយ៉ាឡាអាឡា សាឡាហូឌិន និងអានបា។ អ៊ីរ៉ាក់ប្រកាសជ័យជម្នះប្រឆាំងនឹងពួកឧទ្ទាម IS នៅខែកក្កដា ឆ្នាំ២០១៧ ប៉ុន្តែពួកជ្រុលនិយមមួយចំនួននៅតែបន្តធ្វើការវាយប្រហារនៅទូទាំងប្រទេស៕
