ប្រភពព័ត៌មានពី RT ផ្សាយថ្ងៃទី៣០ ខែកក្កដា ឆ្នាំ២០១៩
រដ្ឋមន្រ្តីក្រសួងការបរទេសអូស្ត្រាលី លោកស្រី ម៉ារ៉ាយ ផេន មានប្រសាសន៍នៅថ្ងៃអង្គារថា សហរដ្ឋអាមេរិកគ្រោងនឹងសាងសង់ហេដ្ឋារចនាសម្ព័ន្ធយោធាបន្ថែមទៀតក្នុងប្រទេសអូស្រ្តាលីនៅពេលដែលសភាយល់ព្រមឧបត្ថម្ភដល់កងទ័ពជើងទឹកអាមេរិកក្នុងចំនួនទឹកប្រាក់ ២១១,៥លានដុល្លារអាមេរិក។ ភ្នាក់ងារសារព័ត៌មានបន្ថែមថា សេចក្តីថ្លែងការណ៍នេះធ្វើឡើងចំពេលដែលសម្ព័ន្ធមិត្តលោកខាងលិចព្រួយបារម្ភកាន់តែខ្លាំងឡើងចំពោះកិច្ចខិតខំប្រឹងប្រែងរបស់ប្រទេសចិនក្នុងការពង្រីកឥទ្ធិពលរបស់ខ្លួននៅមហាសមុទ្រប៉ាស៊ីហ្វិក។ លោកស្រី ផេន ប្រាប់បណ្តាញសារព័ត៌មានថា “ការអភិវឌ្ឍមូលដ្ឋាននានានឹងគាំទ្រដល់ការផ្តួចផ្តើមរបស់កងកម្លាំង”។ លោកលើកឡើងសំដៅដល់កិច្ចព្រមព្រៀងនានាក្នុងឆ្នាំ២០១១ រវាងសហរដ្ឋអាមេរិក និងអូស្ត្រាលីដើម្បីពង្រឹងចំណងទាក់ទងការពារជាតិរបស់ខ្លួន។ គំនិតផ្តួចផ្តើមទាំងនោះរួមបញ្ចូលទាំងការបណ្តុះបណ្តាលទាហានម៉ារីនអាមេរិកចំនួន ២,៥០០នាក់ក្នុងប្រទេសអូស្ត្រាលីជារៀងរាល់ឆ្នាំ និងការបណ្តុះបណ្តាលរួមគ្នារវាងកងទ័ពអាកាសរបស់សម្ព័ន្ធមិត្ត។ ប្រព័ន្ធផ្សព្វផ្សាយអូស្រ្តាលីរាយការណ៍នៅដើមខែនេះថា ទីក្រុងវ៉ាស៊ីនតោនមានផែនការសាងសង់កំពង់ផែថ្មីមួយនៅក្បែរតំបន់ដាវីន ដែលជារដ្ឋធានីលើទឹកដីភាគខាងជើងរបស់ប្រទេសអូស្រ្តាលី។ កងម៉ារីនអាមេរិកដែលធ្លាប់ពង្រាយកម្លាំងផ្លាស់ប្តូរគ្នាប្រចាំឆ្នាំសម្រាប់ការបណ្តុះបណ្តាលបានតាំងជំហក្នុងមូលដ្ឋានអូស្ត្រាលីនៅតំបន់ដាវីន៕
