ប្រភពព័ត៌មាន TASS ផ្សាយថ្ងៃទី០៥ ខែសីហា ឆ្នាំ២០១៩
យោងតាម Al Arabiya រាយការណ៍ថា នៅថ្ងៃច័ន្ទនេះមានហេតុការណ៍ផ្ទុះគ្រាប់បែកកើតឡើងក្រោយពីមានឧប្បត្តិហេតុគ្រោះថ្នាក់ចរាចរណ៍មួយនៅទីប្រជុំជននៃរដ្ឋធានីគែរ ប្រទេសអេហ្ស៊ីប។ យ៉ាងហោចណាស់មានមនុស្សចំនួន១៧នាក់ស្លាប់ និង៣២នាក់ផ្សេងទៀតរងរបួសក្នុងហេតុការណ៍នោះ។ Al Arabiya ដកស្រង់ពីក្រសួងសុខាភិបាលអេហ្ស៊ីបថា “មនុស្ស១៧នាក់ស្លាប់ និង ៣២នាក់រងរបួសក្នុងហេតុការណ៍ផ្ទុះនៅខាងក្រៅវិទ្យាស្ថានជាតិអេហ្ស៊ីបក្នុងរដ្ឋធានីគែរ”។ គេហទំព័រព័ត៌មានក្នុងស្រុករបស់ប្រទេសអេហ្ស៊ីប Egyptian Streets រាយការណ៍នៅព្រឹកថ្ងៃនេះថាមនុស្ស១៦នាក់ស្លាប់ និង២១នាក់រងរបួសក្នុងការផ្ទុះ ក្រោយពីមានការប៉ះទង្គិចរថយន្តជាច្រើននៅខាងក្រៅវិទ្យាស្ថាននៃទីក្រុងគែរ។ ការផ្ទុះនេះថែមទាំងបណ្តាលឱ្យខូចខាតដល់គ្រឿងបរិក្ខារនានានៅខាងក្នុងវិទ្យាស្ថាន។ ប្រភពព័ត៌មាន Egyptian Streets រាយការណ៍ថា “សេចក្តីថ្លែងការណ៍បឋមចេញផ្សាយដោយក្រសួងមហាផ្ទៃបង្ហាញថាការផ្ទុះនេះកើតឡើងមុនវេលាពាក់កណ្តាលអធ្រាត្រ ហើយវាកើតឡើងបណ្តាលមកពីរថយន្តបើកបរនៅខាងក្រៅវិទ្យាស្ថានក្នុងទិសដៅផ្ទុយគ្នាបុកជាមួយរថយន្ត៣គ្រឿងផ្សេងទៀត។ បុគ្គលិក និងអ្នកជំងឺនៅវិទ្យាស្ថានខេនស័រត្រូវគេជម្លៀសចេញភ្លាមៗក្រោយពីមានឧប្បត្តិហេតុនោះ ហើយអគ្គរដ្ឋអាជ្ញាអេហ្ស៊ីបបញ្ជាឱ្យបើកការស៊ើបអង្កេតជាបន្ទាន់ដោយបញ្ជូនក្រុមស៊ើបអង្កេតមួយក្រុមទៅធ្វើប្រតិបត្តិការនៅកន្លែងកើតហេតុ៕
