ប្រភពព័ត៌មានពី RT ផ្សាយថ្ងៃទី០៧ ខែសីហា ឆ្នាំ២០១៩
ប្រទេសទួរគី និងសហរដ្ឋអាមេរិកព្រមព្រៀងបង្កើតមជ្ឈមណ្ឌលប្រតិបត្តិការរួមគ្នាមួយនៅក្នុងប្រទេសទួរគីដើម្បីអនុវត្ត “តំបន់សុវត្ថិភាព”ដែលធ្លាប់គ្រោងទុកយូរមកហើយនៅភាគខាងជើងប្រទេសស៊ីរី។ ប្រទេសទាំងពីរធ្លាប់មានទំនាស់គ្នាលើការគ្រប់គ្រងតំបន់នោះអស់រយៈពេលជាច្រើនខែ។ ក្រសួងការពារជាតិរបស់ប្រទេសទួរគីប្រកាសនូវរបកគំហើញថ្មីនៅថ្ងៃពុធក្រោយពីមានកិច្ចពិភាក្សាអស់រយៈពេល៣ថ្ងៃ។ ក្រសួងនិយាយថា “មជ្ឈមណ្ឌលសកម្មភាពរួម” នឹងបង្កើតឡើងឱ្យបានឆាប់តាមដែលអាចធ្វើទៅបានហើយនឹងធ្វើការបង្កើតច្រករបៀងសន្តិភាពដើម្បីអនុញ្ញាតឱ្យជនភៀសខ្លួនវិលត្រឡប់ទៅកាន់ប្រទេសស៊ីរីវិញ។ ការបង្កើតតំបន់សុវត្ថិភាពបណ្តោះអាសន្ន ធ្លាប់ធ្វើឡើងលើកដំបូងនៅខែមករាគឺមួយខែបន្ទាប់ពីប្រធានាធិបតីអាមេរិកលោក ដូណាល់ ត្រាំ ប្រកាសពីការដកទ័ពរបស់សហរដ្ឋអាមេរិកនៅភាគខាងជើងប្រទេសស៊ីរី។ ក្រុងវ៉ាស៊ីនតោនមើលឃើញគម្រោងតំបន់សុវត្ថិភាពថាជាធ្យោបាយមួយដើម្បីរារាំងទីក្រុងអង់ការ៉ាពីការបង្ក្រាបនៅទូទាំងព្រំដែនស៊ីរីទៅលើកងជីវពលឃឺដ។ ប្រទេសទួរគីទាមទារឱ្យមានតំបន់សុវត្ថិភាពណាមួយដែលពុំមានវត្តមានកងកម្លាំងឃឺដ (ប្រទេសទួរគីចាត់ទុកឃឺដថាជាភេរវករ)។ នៅខែមុនរដ្ឋមន្ត្រីការបរទេសទួរគីលោក មេឡុត ខាវូសូលូ គំរាមធ្វើប្រតិបត្តិការយោធាប្រឆាំងនឹងជនជាតិឃឺដប្រសិនបើពុំមានការបង្កើតតំបន់សុវត្ថិភាព៕
