ប្រភពព័ត៌មានពី BBC ចេញផ្សាយថ្ងៃទី១២ ខែសីហា ឆ្នាំ២០១៩
ប៉ូលិសបានបាញ់ឧស្ម័នបង្ហូរទឹកភ្នែក ដើម្បីបំបែកក្រុមអ្នកតវ៉ាទូទាំងទីក្រុងហុងកុង កាលពីយប់ថ្ងៃអាទិត្យ ខណៈបាតុកម្មដែលបន្តអស់រយៈពេល១០សប្តាហ៍កន្លងមកហើយ។ ហើយការបាញ់ឧស្ម័នបង្ហូរទឹកភ្នែកនេះក៏ត្រូវបានបាញ់នៅក្នុងស្ថានីយ៍ Kwai Fong ផងដែរ ដោយយោងតាមប្រព័ន្ធផ្សព្វផ្សាយក្នុងស្រុកបានរាយការណ៍ថា នេះក៏ជាលើកទី១ផងដែរដែលប៉ូលិសបាញ់ឧស្ម័នបង្ហូរទឹកភ្នែកចូលទៅក្នុងស្ថានីយ៍រថភ្លើងក្រោមដីមួយ។ គួររំលឹកថា ការតវ៉ានេះត្រូវបានបង្កឡើងដោយសារច្បាប់ធ្វើបត្យាប័នដ៏ចម្រូងចម្រាស ដែលអាចអនុញ្ញាតឱ្យឧក្រិដ្ឋជនសង្ស័យត្រូវបញ្ជូនទៅកាន់ប្រទេសចិនដីគោកសម្រាប់ការកាត់ក្តី ប៉ុន្តែក្រុមអ្នករិះគន់និយាយថាអាចធ្វើឱ្យប៉ះពាល់ដល់សេរីភាពច្បាប់របស់ទីក្រុងហុងកុង និងប្រើប្រាស់ដើម្បីបំបិតសំឡេងអ្នករិះគន់ទៀតផង៕
