ប្រភពព័ត៌មានពី RT ផ្សាយថ្ងៃទី១៣ ខែសីហា ឆ្នាំ២០១៩
ប៉ូលិសនិយាយថា បុរសម្នាក់កាន់កាំបិតចាក់ស្ត្រីម្នាក់នៅទីក្រុងស៊ីដនីប្រទេសអូស្ត្រាលី និងព្យាយាមវាយប្រហារមនុស្សជាច្រើនមុនពេលគាត់ត្រូវគេចាប់ខ្លួន។ រូបភាពវិដេអូរពីកន្លែងកើតហេតុបង្ហាញពីការស្រែករបស់បុរសនោះថា “អាឡាស់ អាកបា” នៅពេលដែលគាត់លោតលើដំបូលរថយន្តខ្មៅមួយនៅផ្លូវបំបែក។ បន្ទាប់មករថយន្តបើករត់ហើយអ្នកវាយប្រហារលោតទៅលើដីដោយស្រែកថា “បាញ់ខ្ញុំ!” ឆាប់បាញ់ចំក្បាលខ្ញុំមក! ខ្ញុំចង់ស្លាប់!” គាត់ស្រែក ហើយរត់ទៅខាងក្រោយនៅផ្លូវបំបែកខណៈដែលបុរសម្នាក់ទៀតព្យាយាមតតាំងជាមួយគាត់ដោយប្រើកៅអី។ គេឃើញអ្នកវាយប្រហារកាន់កាំបិតនៅដៃស្តាំរបស់គាត់ហើយអាវរបស់គាត់ប្រឡាក់ឈាម។ មួយសន្ទុះក្រោយមកក្រុមអ្នកឈរមើល និងក្រុមពន្លត់អគ្គីភ័យ មួយក្រុមដែលមានវត្តមាននៅក្បែរនោះបានចាប់ជនដៃដល់ផ្ទប់ទៅនឹងដី រហូតដល់ប៉ូលិសទៅដល់ទើបឈានដល់ការចាប់ខ្លួនគាត់។ ដោយកោតសរសើរចំពោះសកម្មភាពរបស់ពួកគេអគ្គនាយកលោក ហ្គាវីន វ៉ូឌ មានប្រសាសន៍ថា “អាចចូលទៅជិតមនុស្សដោយមានភស្តុតាងច្បាស់លាស់នៃការចាក់ អ្នកទាំងនោះជាវីរបុរស”។ អាជ្ញាធរនៅតែមិនទាន់មានពន្លឺចំពោះមូលហេតុ ឬហេតុផលសម្រាប់ការវាយប្រហារ។ ទោះយ៉ាងណាលោក វ៉ូដ ប្រកាសថាជនសង្ស័យ ធ្វើការវាយប្រហារដោយខ្លួនឯងហើយគ្មានអ្នកសមគំនិតទេ។ របាយការណ៍និយាយថា គាត់ប្រហែលជាទើបតែគេចខ្លួនចេញពីមណ្ឌលសុខភាពផ្លូវចិត្តថ្មីៗនេះ ប៉ុន្តែយ៉ាងណាវានៅតែត្រូវមានការបញ្ជាក់ពីរឿងនេះ។ ក្រោយមកនៅថ្ងៃដដែលប៉ូលិសស៊ីដនីបញ្ជាក់ថា ពួកគេរកឃើញសាកសពស្ត្រីម្នាក់នៅខាងក្នុងផ្ទះល្វែងដោយលើកឡើងថាករណីនេះអាចជាប់ទាក់ទងនឹងការចាក់សម្លាប់យ៉ាងសាហាវនេះ។ ស្ត្រីម្នាក់ទៀតបង្ហាញខ្លួននៅឯស្ថានីយ៍ប៉ូលីសដោយមានរបួសស្រាលដែលអាចបណ្តាលមកពីការវាយប្រហារដោយកាំបិតនេះផងដែរ៕
