ប្រភពព័ត៌មានពី RT ផ្សាយថ្ងៃទី១៤ ខែសីហា ឆ្នាំ២០១៩
ប៉ូលិសដាណឺម៉ាកនិយាយនៅថ្ងៃពុធថា ពួកគេចាប់ខ្លួនបុរសជនជាតិស៊ុយអែតអាយុ២២ឆ្នាំម្នាក់ និងចេញដីកាអន្តរជាតិសម្រាប់ចាប់ខ្លួនជនជាតិស៊ុយអែតអាយុ២៣ឆ្នាំម្នាក់ផ្សេងទៀត។ អ្នកទាំងពីរជាប់សង្ស័យថាជាអ្នកនៅពីក្រោយការផ្ទុះនៅខាងក្រៅការិយាល័យរបស់ភ្នាក់ងារពន្ធដាដាណឺម៉ាកក្នុងទីក្រុងខប់ផេនហាហ្គេននៅសប្តាហ៍មុន។ មនុស្សម្នាក់រងរបួសស្រាលក្នុងការផ្ទុះបណ្តាលឱ្យបែកទ្វារ កញ្ចក់ និងបង្អួចនៅច្រកចូលអាគារ ហើយប៉ូលិសនិយាយថាវាជាការវាយប្រហារដោយចេតនា។ ប៉ូលិសបញ្ជាក់ថានៅថ្ងៃទី១០ ខែសីហាការផ្ទុះមួយកើតឡើងនៅខាងក្រៅស្ថានីយ៍ប៉ូលិសក្នុងទីក្រុងខប់ផេនហាហ្គេន ហើយការបំផ្ទុះលើកទី២ វាយប្រហាររដ្ឋធានីដាណឺម៉ាកក្នុងរយៈពេល៤ថ្ងៃ។ ហេតុការណ៍នោះមិនបណ្តាលឱ្យនរណាម្នាក់រងរបួសទេដោយសារវាកើតឡើងនៅខាងក្រៅទីក្រុង៕
