ប្រភពព័ត៌មានពី RT ផ្សាយថ្ងៃទី២០ ខែសីហា ឆ្នាំ២០១៩
ប្រធានាធិបតី រ៉ូឌ្រីហ្គោ ឌូដឺតេ ព្រមានចាត់ចំណាត់ការមិនរាក់ទាក់ចំពោះនាវាបរទេសដែលធ្វើដំណើរក្នុងដែនទឹករបស់ប្រទេសហ្វីលីពីនដោយគ្មានការអនុញ្ញាត ខណៈមានការប្រឈមដ៏កម្រមួយពីនាវាចម្បាំងរបស់ប្រទេសចិននៅចម្ងាយពីរឬបីម៉ាយពីឆ្នេរម៉ានីល។ នៅថ្ងៃអង្គារនេះ លោក សាលវ៉ាឌ័រ ផេននេឡួ អ្នកនាំពាក្យរបស់លោក ឌូដឺតេ ទាមទារឱ្យមានតម្លាភាពចំពេលយោធាហ្វីលីពីនមើលឃើញនាវាចម្បាំងចិនជាច្រើនធ្វើដំណើរជិតដែនទឹកប្រទេសហ្វីលីពីនក្នុងចម្ងាយ១២ម៉ាយនៅឆ្នាំនេះ។ លោក ផេននេឡួ មានប្រសាសន៍ថា “នាវាបរទេសទាំងអស់ដែលឆ្លងកាត់ដែនទឹករបស់យើងត្រូវតែជូនដំណឹង និងទទួលបានការត្រួតពិនិត្យពីអាជ្ញាធររដ្ឋាភិបាលមុនពេលឆ្លងកាត់។” លោកបន្ថែមថា “យើងអាចអនុលោមតាមលក្ខណៈមិត្តភាពឬយើងចាត់វិធានការដោយមិនរាក់ទាក់” ។ លោកពុំបានបញ្ជាក់លម្អិតពីការអនុវត្តបែបណានឹងអាចកើតឡើងនោះទេ៕
