ប្រភពព័ត៌មានពី RT ចុះផ្សាយថ្ងៃទី២៦ ខែសីហា ឆ្នាំ ២០១៩
ប្រធានាធិបតីទួរគីលោក Recep Tayyip Erdogan និយាយកាលពីថ្ងៃចន្ទថា កងទ័ពជើងគោកទួរគីនឹងចូលទៅក្នុងតំបន់សុវត្ថិភាពមួយដែលបានគ្រោងទុកនៅភាគខាងជើងប្រទេសស៊ីរីក្នុងពេលឆាប់ៗនេះ។ ទីក្រុងអង់ការ៉ាបើកមជ្ឈមណ្ឌលប្រតិបត្តិការរួមគ្នាមួយជាមួយសហរដ្ឋអាមេរិកសម្រាប់តំបន់សុវត្ថិភាពនៅចុងសប្តាហ៍នេះ។ លោក Erdogan មានប្រសាសន៍ថា “យើងកំពុងធ្វើកិច្ចការនេះសន្សឹមៗនៅក្នុងកិច្ចខិតខំប្រឹងប្រែងរបស់យើងដើម្បីបង្កើតតំបន់សុវត្ថិភាពមួយ”។ រ៉យទ័រដកស្រង់សម្តីថា “ដូចគ្នានឹងបញ្ហាផ្សេងទៀតដែលបញ្ហាខ្លះមិនអាចមើលឃើញនោះទេ យើងកំពុងដោះស្រាយបញ្ហានៅភាគខាងកើតនៃ Euphrates”។ ប្រទេសទួរគីនិយាយថា ខ្លួននឹងមិនអត់ធ្មត់ចំពោះការពន្យាពេលនៃកិច្ចព្រមព្រៀងនេះទេដោយព្រមានថានឹងបន្ថែមការវាយលុកឆ្លងកាត់ព្រំដែនដោយខ្លួនឯងដើម្បីបោសសំអាតព្រំដែនរបស់ខ្លួនពីកងជីវពល YPG របស់ក្រុមឃឺដនៅប្រទេសស៊ីរីប្រសិនបើចាំបាច់។ លោក Erdogan និយាយថា ប្រទេសទួរគីធ្វើការរៀបចំទាំងអស់ដើម្បីអនុវត្តផែនការផ្ទាល់ខ្លួនប្រសិនបើការរំពឹងទុករបស់ខ្លួនមិនបានសម្រេចនោះ។ UAVs និងឧទ្ធម្ភាគចក្ររបស់យើងចូលទៅក្នុងតំបន់នេះហើយ ពិសេសឆាប់ៗនេះកងទ័ពជើងគោករបស់យើងក៏នឹងចូលមកក្នុងតំបន់នេះដែរ៕
