ប្រភពព័ត៌មានពី RT ចុះផ្សាយថ្ងៃទី២៨ ខែសីហា ឆ្នាំ២០១៩
ពួកតាលីបង់កាលពីថ្ងៃពុធនេះនិយាយថាខ្លួនឈានជិតដល់ “កិច្ចព្រមព្រៀងចុងក្រោយ” ជាមួយមន្រ្តីសហរដ្ឋអាមេរិកស្តីពីកិច្ចព្រមព្រៀងមួយដែលកងកម្លាំងអាមេរិកនឹងដកខ្លួនចេញពីប្រទេសអាហ្វហ្គានីស្ថាន។ អ្នកនាំពាក្យការិយាល័យនយោបាយរបស់តាលីបង់នៅទីក្រុងដូហាលោក Suhail Shaheen និយាយថា “យើងសង្ឃឹមថានឹងមានដំណឹងល្អឆាប់ៗនេះសម្រាប់ប្រជាជាតិមូស្លីម និងការស្វែងរកឯករាជ្យភាពរបស់យើង”។ តាមការបញ្ជាក់របស់ Reuters បានឲ្យដឹងថា ការចរចាជាច្រើនអំពីវិធីបញ្ចប់សង្រ្គាម ១៨ឆ្នាំនៅអាហ្វហ្គានីស្ថានបានកើតឡើងនៅរដ្ឋធានីដូហារបស់កាតាដែលការចរចាលើកទី៩ បានចាប់ផ្តើមកាលពីសប្តាហ៍មុននេះ។ ទីក្រុងវ៉ាស៊ីនតោនកំពុងចរចាដកទ័ពជាថ្នូរនឹងការសន្យាពីពួកតាលីបង់ថាអាហ្វហ្គានីស្ថាននឹងមិនក្លាយជាជម្រកសម្រាប់ក្រុមសកម្មប្រយុទ្ធឥស្លាមផ្សេងទៀតនោះទេ៕
