ប្រភពព័ត៌មានពី RT ចុះផ្សាយថ្ងៃទី០៨ ខែកញ្ញា ឆ្នាំ២០១៩
បាតុកររាប់ពាន់នាក់បានដើរក្បួននៅទូទាំងប្រទេសបារាំងដែលមានរយៈពេល៤៣សប្តាហ៍ជាប់ៗគ្នានៃបាតុកម្មរបស់ក្រុមអ្នកតវ៉ាអាវលឿង ប្រឆាំងនឹងគោលនយោបាយសេដ្ឋកិច្ចរបស់ប្រធានាធិបតីលោក Emmanuel Macron។ ប៉ូលិសបានឃាត់ខ្លួនក្រុមបាតុករចំនួន៨៩នាក់នៅក្នុងរដ្ឋធានីប៉ារីសដោយនិយាយនៅលើបណ្តាញសង្គម Twitter ថា ការហែក្បួនរបស់ពួកគេគឺខុសច្បាប់។ ប្រព័ន្ធផ្សព្វផ្សាយបារាំងរាយការណ៍ថាក្រុមអ្នកតវ៉ាអាវលឿងកំពុងព្យាយាមតវ៉ានៅជិត Champs Elysee ដែលត្រូវបានហាមឃាត់ដោយអាជ្ញាធរនៅក្នុងនិទាឃរដូវ បន្ទាប់ពីទីនេះបានក្លាយជាចំណុចក្តៅសម្រាប់ការប្រមូលផ្តុំតវ៉ាដែលមានលក្ខណស្រដៀងគ្នានោះ។ មនុស្ស៨០០នាក់នាំគ្នាធ្វើបាតុកម្មនៅរដ្ឋធានីក្នុងទីតាំងផ្សេងទៀតផងដែរ។ ការធ្វើបាតុកម្មដ៏ធំបំផុតក្នុងថ្ងៃនោះគឺនៅភាគខាងត្បូងនៃទីក្រុង Montpellier ដែលមនុស្សជាង២,០០០នាក់បានធ្វើការតវ៉ាតាមដងផ្លូវ។ ប៉ូលិសបានប្រើឧស្ម័នបង្ហូរទឹកភ្នែកដើម្បីបំបែកបាតុករមួយចំនួនដែលបានគប់ដុំថ្ម និងស្រាក្រឡុក Molotov cocktails។ ឡានប៉ូលិសទទេមួយគ្រឿងត្រូវដុតចោលផងដែរ។ នៅ Normandy Rouen មនុស្ស២៦នាក់ត្រូវចាប់ខ្លួន និង១០០នាក់ទៀតត្រូវជាប់ឈ្មោះពាក់ព័ន្ធដោយសារតែពួកគេមិនគោរពបម្រាមរបស់ទីក្រុងក្នុងការធ្វើបាតុកម្មនៅទីប្រជុំជននោះ៕
