ប្រភពព័ត៌មានពី RT ផ្សាយថ្ងៃ១០ ខែកញ្ញា ឆ្នាំ២០១៩
រដ្ឋមន្ត្រីការបរទេសទួរគីលោក មេឡុត កាវុសុលូ មានប្រសាសន៍នៅថ្ងៃអង្គារថា ទីក្រុងវ៉ាស៊ីនតោនកំពុងជាប់គាំងក្នុងការអនុវត្តកិច្ចព្រមព្រៀងដើម្បីបង្កើតតំបន់សុវត្ថិភាពមួយនៅភាគខាងជើងប្រទេសស៊ីរី។ ថ្លែងនៅក្នុងទីក្រុងអង់ការ៉ាលោក កាវុសុលូ មានប្រសាសន៍ថា វិធីសាស្រ្តរបស់សហរដ្ឋអាមេរិកចំពោះកិច្ចព្រមព្រៀងនេះគឺពុំមានការពេញចិត្តទេហើយជំហានដែលអាមេរិកអនុវត្តគឺមានតែការអះអាងប៉ុណ្ណោះ។ សម្ព័ន្ធមិត្តណាតូយល់ព្រមបង្កើតតំបន់មានសុវត្ថិភាព នៅតាមព្រំដែនភាគខាងត្បូងប្រទេសទួរគី និងបោសសំអាតតំបន់របស់យុទ្ធជន YPG ឃឺដស៊ីរី។ ភ្នាក់ងារព័ត៌មានរាយការណ៍ថា នៅថ្ងៃអាទិត្យកងទ័ពទួរគី និងសហរដ្ឋអាមេរិកអនុវត្តការល្បាតលើដែនដីយោធារួមគ្នាលើកដំបូងរបស់ពួកគេនៅទីនោះ៕
