រដ្ឋមន្ត្រីក្រសួងសុខាភិបាលលោក Fahrettin Koca មានប្រសាសន៍នៅថ្ងៃពុធថា ប្រទេសទួរគីបានឈានចូលដំណាក់កាលថ្មីមួយនៅក្នុងការប្រយុទ្ធប្រឆាំងនឹងជំងឺកូវីដ១៩ ដោយមានគោលបំណងលុបបំបាត់ជំងឺនេះ និងអុនញ្ញាតិឱ្យមានការបើកដំណើរការអាជីវកម្មឡើងវិញ។ គោលការណ៍ណែនាំពីឥរិយាបទសង្គមថ្មីនឹងត្រូវបានកំណត់ដើម្បីការពារការឆ្លងរីករាលដាលឡើងវិញ។
ភ្នាក់ងារសារព័ត៌មានបានដកស្រង់ប្រសាសន៍របស់លោក Koca ថា រដ្ឋាភិបាលនឹងផ្សព្វផ្សាយការណែនាំដល់អ្នកធ្វើអាជីវកម្ម ដើម្បីធានាថា ពួកគេនៅតែបន្តវិធានការការពារមេរោគ នៅពេលពួកគេបើកដំណើរការអាជីវកម្មឡើងវិញនៅសប្តាហ៍ក្រោយ។ ក្រសួងនឹងបង្កើនសមត្ថភាពតេស្ត និងបន្តកិច្ចខិតខំប្រឹងប្រែងតាមដានទំនាក់ទំនងផ្សេង។ លោក Koca បន្ថែមថា ពលរដ្ឋទួរគីគួរតែពាក់ម៉ាស់និងរក្សាគម្លាតសង្គមនៅទីសាធារណៈ។
រដ្ឋមន្ត្រីឧស្សាហកម្មលោក Mustafa Varank មានប្រសាសន៍នៅថ្ងៃអង្គារថារោងចក្រផលិតរថយន្តធំៗរបស់ប្រទេសទួរគីនឹងចាប់ផ្តើមដំណើរការឡើងវិញនៅថ្ងៃទី១១ ខែឧសភា។ លោកបានប្រកាសពីការបើកដំណើរការនេះឡើងក្រោយយពីលោកប្រធានាធិបតី Recep Tayyip Erdogan បានប្រកាសចាប់ផ្តើមបើកដំណើរការសេដ្ឋកិច្ចធម្មតាឡើងវិញបន្ទាប់ពីមានការផ្ទុះឡើងនៃការឆ្លងជំងឺកូវីដ១៩ ៕
ប្រភពព័ត៌មាន RT ផ្សាយថ្ងៃទី៦ ខែឧសភា ឆ្នាំ២០២០
