យោងតាមសេចក្តីរាយការណ៍ រដ្ឋអាជ្ញាតួកគីកាលពីថ្ងៃអង្គារបានចេញដីកាចាប់ខ្លួនជនសង្ស័យចំនួន ៦៤នាក់ ជាសមាជិកក្រុមរដ្ឋអ៊ីស្លាម ដែលមានសកម្មភាពក្នុងគោលបំណងផ្តល់ហិរញ្ញប្បទានដល់ក្រុមភេរវកម្ម។
ការិយាល័យព្រះរាជអាជ្ញាបាននិយាយក្នុងសេចក្តីថ្លែងការណ៍មួយថា ក្រុមប្រឹក្សាស៊ើបអង្កេតឧក្រិដ្ឋកម្មហិរញ្ញវត្ថុរបស់ប្រទេសតួកគី បានរកឃើញភស្តុតាងនៃប្រតិបត្តិការគណនីធនាគារ និងការបង្ហោះតាមប្រព័ន្ធផ្សព្វផ្សាយសង្គមរបស់ជនសង្ស័យ ដែលរៀបរាប់លម្អិតអំពីជំនួយហិរញ្ញវត្ថុដល់សមាជិករដ្ឋអ៊ីស្លាម។
អ្នកឃ្លាំមើលបានកំណត់ជនសង្ស័យបានប្រមូលជំនួយជាសាច់ប្រាក់តាមរយៈគណនីធនាគារ ដើម្បីជួយសមាជិករដ្ឋអ៊ីស្លាមដែលរស់នៅក្នុងប្រទេសតួកគី និងបានចូលរួមនៅក្នុងសកម្មភាពរបស់ក្រុមភេរវកម្ម នៅក្នុងតំបន់ជម្លោះក្នុងប្រទេសស៊ីរី។
ទីក្រុងអង់ការ៉ាបានចាត់តាំងក្រុមរដ្ឋអ៊ីស្លាម ជាអង្គការភេរវករក្នុងឆ្នាំ២០១៣ និងក្រុមនេះត្រូវបានដាក់ការចោទប្រកាន់ឱ្យទទួលខុសត្រូវលើការវាយប្រហារដ៏សាហាវ នៅប្រទេសតួកគីតាំងពីឆ្នាំ២០១៥។
ដើម្បីជាការឆ្លើយតប អង្គភាពប្រឆាំងភេរវកម្មរបស់តួកគីបានធ្វើប្រតិបត្តិការប្រឆាំងនឹងសមាជិកក្រុមនេះក្នុងប្រទេស។ (ទីភ្នាក់ងារសារព័ត៌មានស៊ីនហួ)
ប្រភពព័ត៌មាន pmnewsnigeria ចុះថ្ងៃទី១៩ ខែមករា ឆ្នាំ២០២២
ប្រែសម្រួលដោយ ឱក សុវណ្ណារ័ត្ន
