ភ្នំពេញ ៖ បន្ទាប់ពីបានសិក្សាស្វែងយល់ពីការប្រើប្រាស់ ការថែទាំនិងអនុវត្តជាក់ស្តែងទៅលើម៉ាស៊ីន (ORTEC) ជាប្រភេទម៉ាស៊ីនស្កេនសារធាតុវិទ្យុសកម្មរួចមក នៅព្រឹកថ្ងៃទី ២៣ ខែ តុលា ឆ្នាំ ២០១៤ ដែលជាថ្ងៃទី២ វគ្គបណ្តុះបណ្តាល បានបន្តការសិក្សាស្វែងយល់ពីការប្រើប្រាស់ វិធីក្នុងការថែទាំ និងអនុវត្តលើម៉ាស៊ីនស្កេនសារធាតុវិទ្យុសកម្ម (Backpack) នៅគណៈកម្មាធិការជាតិប្រឆាំងភេរវកម្ម (ទីតាំងក្នុងអគ្គស្នងការដ្ឋាននគរបាលជាតិ) ។
តាមរយៈបទបង្ហាញរបស់លោក ហង់ ផល្លា ជាគ្រូឧទ្ទេសនាមនៅក្នុងវគ្គនេះ បានបញ្ជាក់ថា ម៉ាស៊ីនស្កេនសារធាតុវិទ្យុសកម្ម (Backpack) នេះ មានតួនាទីកំណត់ទីតាំងណាមួយថាមានសារធាតុវិទ្យុសកម្ម ឬអត់ ហើយសារធាតុវិទ្យុសកម្មនោះមានទំហំប៉ុណ្ណា និងមានឥទ្ធិពលកំរិតណា, និងអាចបញ្ជាក់ពីអត្តសញ្ញាណរបស់សារធាតុវិទ្យុសកម្មតាមរយៈប្រព័ន្ធ GPS ថែមទៀតផង ។ លោកបានបន្ថែមទៀតថា ម៉ាស៊ីន (Backpack) នេះ អាចស្ពាយយកតាមខ្លួន និងអាចចល័តបានគ្រប់ទីកន្លែងដើម្បីរាវរកសារធាតុវិទ្យុសកម្ម ក្នុងគោលដៅរក្សាសុខសុវត្តិភាពជូនថ្នាក់ដឹកនាំ ក៍ដូចជាសន្តិសុខជាតិទាំងមូល ។
គួររំលឹកថា ម៉ាស៊ីនស្កេនសារធាតុវិទ្យុសកម្មទាំង ០៤ប្រភេទ ដែលសហគមន៍អ៊ឺរ៉ុបនិង IAEA បានផ្តល់ជូនលេខាធិការដ្ឋាន គ.ជ.ប.ភ រួមមាន ម៉ាស៊ីន ORTEC, Backpack, Pager និង RIID ហើយក្រោយពីបញ្ចប់វគ្គបណ្តុះបណ្តាលនេះ ល.គ.ជ.ប.ភ និងប្រគល់បន្តជូនទៅបញ្ជាការដ្ឋានជាតិកម្លាំងពិសេសប្រឆាំងភេរវកម្ម ដើម្បីយកទៅប្រើប្រាស់ឲ្យមានប្រសិទ្ធភាពខ្ពស់ ៕
