កាលពីជាងមួយខែមុនកន្លងទៅនេះ Google បានពន្យាពេលចូលធ្វើការនៅការិយាល័យវិញ រហូតដល់ខែមិថុនាតែម្ដង សម្រាប់បុគ្គលិកទាំងអស់របស់ខ្លួន ប៉ុន្ដែរហូតមកដល់ពេលឥឡូវនេះ ពួកគេហាក់បីដូចជាពិចារណាឡើងវិញ ដោយបានរំពឹងទុកថា អាចនឹងត្រូវអនុញ្ញាតឲ្យ ធ្វើការនៅផ្ទះពេញមួយឆ្នាំនេះ។
យ៉ាងណាមិញ សម្រាប់បុគ្គលិកមួយចំនួន ដែលត្រូវការចាំបាច់នៅការិយាល័យ នឹងមានសិទ្ធិមកធ្វើការវិញបាន ចាប់ផ្ដើមពីដើមខែមិថុនា ឬ កក្កដា។
លោក Sundar Pichai ដែលត្រូវជានាយកប្រតិបត្តិក្រុមហ៊ុន Alphabet របស់ Google បាននិយាយប្រាប់បុគ្គលិករបស់ខ្លួនថា ពួកគេទំនងជាអាចធ្វើការនៅផ្ទះ រហូតដល់ដាច់ឆ្នាំនេះតែម្ដង ដោយសម្រាប់បុគ្គលិកមួយចំនួន នឹងត្រូវត្រឡប់មកកាវិយាល័យវិញ ប៉ុន្ដែនឹងស្ថិតនៅកន្លែងធ្វើការ ដែលមានសវត្ថិភាពបំផុត។ ខណៈពេលដែល វីរុសកូរ៉ូណា ឬ កូវីដ១៩ នៅមិនទាន់អាចគ្រប់គ្រងបាន 100% នៅឡើយទេ ដោយប្រទះឃើញមាន ចំនួនកើនឡើងជាប្រចាំថ្ងៃ នៅឯសហរដ្ឋអាមេរិក និងប្រទេសជាច្រើនទៀត ជុំវិញពិភពលោក ដូច្នេះហើយការសម្រេចចិត្តទាំងអស់នោះ អាចនឹងប្រែប្រួលតាមស្ថានភាព ក៏អាចថាបានដែរ។
អ្នកវិភាគជំនាញមួយចំនួន ក៏បានព្យាករណ៍ហើយថា វីរុសដ៏កាចសាហាវនេះ នឹងអាចបាត់ទៅវិញទាំងស្រុង ទាល់តែចុងឆ្នាំ ២០២១ ឯណោះ ឬនៅពេលដែលវ៉ាក់សាំង ត្រូវបានតេស្ដជោគជ័យរួចជាស្រេច។ ស្របនឹងពេលទទួលបានដំណឹងនេះ ចំណែកឯក្រុមហ៊ុន Facebook ក៏បានប្រាប់ទៅកាន់បុគ្គលិករបស់ខ្លួន បែបនេះដូចគ្នាដែរ ដោយផ្ដល់សិទ្ធិឲ្យធ្វើការនៅផ្ទះពេញមួយឆ្នាំនេះដដែល ប៉ុន្ដែការិយាល័យនឹងបើកធម្មតាវិញ នៅថ្ងៃទី ៦ ខែកក្កដា ឆ្នាំ ២០២០ ខាងមុខនេះហើយ។
សរុបមកវិញ Google និងព្រមទាំង Facebook កំពុងតែរកបើកការិយាល័យឡើងវិញ នៅចន្លោះពីខែមិថុនា ទៅខែកក្កដាខាងមុខនេះ ដោយផ្ដល់សិទ្ធិឲ្យបុគ្គលិកទាំងឡាយ សុំបន្ដធ្វើការនៅផ្ទះបាន ពេញមួយឆ្នាំនេះតែម្ដង រហូតដល់ស្ថានភាពត្រឡប់មកធម្មតាវិញ។ បើគិតមកដល់ពេលបច្ចុប្បន្ននេះ ករណីឆ្លងសរុបនៃវីរុសកូរ៉ូណា បានកើនឡើងដល់ខ្ទង់ 3,845,607 ករណីហើយ រួមទាំងចំនួនជាឡើងវិញចំនួនខ្ទង់ 1,282,930 ករណី និងចំនួនស្លាប់ខ្ទង់ 269,564 ករណី នៅជុំវិញពិភពលោក៕
