លោក Elon Musk បានប្រាប់តាមរយៈគណនី Twitter ថា ឈ្មោះកូនដែលទើបនឹងកើតរបស់លោកគឺ X Æ A-12 ជាឈ្មោះដែលគេមិនដឹងអានថាម៉េច ប៉ុន្តែមានបង្កប់នូវអត្ថន័យជាច្រើន។
A-12 នៅក្នុងឈ្មោះគឺតំណាងឲ្យយន្តហោះស៊ើបការណ៍របស់ភ្នាក់ងារ CIA ដែលជាសិស្សច្បងរបស់យន្តហោះស៊ើបការណ៍ SR-71 Blackbird ហើយយន្តហោះ SR-71 Blackbird គឺជាយន្តហោះសំណព្វចិត្តរបស់ លោក Elon Musk និងមិត្តស្រី។
កាលពីពាក់កណ្ដាលសតវត្សឆ្នាំ ១៩៥០ ភ្នាក់ងារ CIA បានចាប់ផ្ដើមសិក្សាយន្តហោះថ្មីដែលមកស្នងតំណែងយន្តហោះស៊ើបការណ៍ U-2 ដោយពួកគេចង់បានយន្តហោះដែលពិបាកឲ្យអ្នកដទៃចាប់សញ្ញា និងអាចហោះក្នុងល្បឿនលឿន ក្នុងរយៈកម្ពស់ខ្ពស់។នៅឆ្នាំ ១៩៦៥ យន្តហោះស៊ើបការណ៍ថ្មីរបស់ CIA ដែលជាម៉ូដែល A-12 បានចាប់ផ្ដើមប្រតិបត្តិការជាផ្លូវការ ដែលវាអាចហោះបានក្នុងល្បឿនដល់ ៣៥៤០ គ.ម/ម៉ នៅកម្ពស់ ២៧,៤ គីឡូម៉ែត្រ ជាលក្ខណៈសម្បត្តិដ៏ខ្លាំងមួយដែលសព្វថ្ងៃមិនទាន់មានយន្តហោះណាអាចធ្វើបានប្រសើរជាងនេះ។
យន្តហោះនេះចាប់ផ្ដើមប្រតិបត្តិការចន្លោះខែឧសភា ឆ្នាំ ១៩៦៧ និងខែឧសភា ឆ្នាំ ១៩៦៨ ដែលធ្វើការហោះហើរចំនួន ២៩ លើកទៅកាន់អាស៊ីខាងកើត ក្រោមប្រតិបត្តិការឈ្មោះ Black Shield ដែលធ្វើឈ្លបមើលលើសកម្មភាពរបស់កងទ័ពនៅវៀតណាម។
ក្រោយមកយន្តហោះ A-12 ត្រូវបានជំនួសដោយយន្តហោះ SR-71 Blackbird របស់ Air Force ដែលឌីហ្សាញដោយក្រុមហ៊ុន Lockheed និងផលិតឡើងដោយវិស្វករជំនាញៗជាច្រើនរូប ដើម្បីទទួលបានសមត្ថភាពដូចជា A-12 ដែរ។ SR-71 Blackbird អាចហោះហើរនៅល្បឿន ៣៥២៩ គ.ម/ម៉ និងអាចហោះនៅកម្ពស់ ២៥,៩២ គីឡូម៉ែត្រ៕
