វាមិនមែនជារឿងចម្លែកពេកទេដែលកុំព្យូទ័ររបស់លោកអ្នកអាចត្រូវបានវាយប្រហារពីជនអាណាមិគ ល្គិកណាលោកអ្នកធ្វើការប្រើប្រាស់ឧបករណ៍ទាំងនោះ ជាពិសេសក្នុងពេលមានការតភ្ជាប់ជាមួយប្រព័ន្ធអ៊ិនធឺណេត។
ប៉ុន្តែក្នុងពេលថ្មីៗនេះ សូម្បីនៅក្នុងប្រព័ន្ធ Thunderbolt ក៏នៅតែមានចំណុចខ្សោយ ដែលអាចឱ្យអ្នកវាយប្រហារលួចយកទិន្នន័យក្នុងកុំព្យូទ័រលោកអ្នកបាន ដោយគ្រាន់តែចំណាយពេលប្រហែល ៥នាទីប៉ុណ្ណោះ នេះបើយោងតាមក្រុមអ្នកស្រាវជ្រាវផ្នែកសុវត្ថិភាពនៅ សាកលវិទ្យាល័យ Eindhoven។
ការវាយប្រហារនេះត្រូវបានគេឱ្យឈ្មោះថា Thunderspy ហើយមានការប៉ះពាល់ដល់កុំព្យូទ័រដែលផលិតមុនឆ្នាំ២០១៩ ដែលប្រើប្រព័ន្ធប្រតិបត្តិការ Windows ឬ Linux ជាមួយនឹងឈីប Intel។ ដើម្បីធ្វើការវាយប្រហារនេះ ពួកគេគ្រាន់តែបើកគម្របខាងក្រោយកុំព្យូទ័រ ហើយប្រើឧបករណ៍តូចមួយដើម្បីធ្វើការផ្លាស់ប្ដូរ firmware ដែលគ្រប់គ្រងប្រព័ន្ធរបស់ Thunderbolt។
ទាក់ទងនឹងបច្ចេកវិទ្យា Thunderbolt នេះ ប្រហែលជានៅមានអ្នកខ្លះមិនទាន់ស្គាល់ពីវានៅឡើយទេ។ Thunderbolt គឺជាប្រព័ន្ធរន្ធភ្ជាប់នៅក្នុងកុំព្យូទ័រសម្រាប់តភ្ជាប់ឧបករណ៍បច្ចេកវិទ្យាផ្សេងៗមានដូចជា monitor និង hard drive ជាដើម ដែលអាចបញ្ជូនទិន្នន័យលឿនជាងបច្ចេកវិទ្យា USB។ ដើម្បីទទួលបានល្បឿនដ៏លឿននេះ ប្រព័ន្ធ Thunderbolt ត្រូវបាននិម្មាបនកម្មដែលអាចផ្លាស់ប្តូរទិន្នន័យដោយផ្ទាល់ជាមួយកុំព្យូទ័រ memory ដែលជាហេតុនាំឱ្យមានចំណុចខ្សោយនេះ។
ដើម្បីចៀសវាងពីការវាយប្រហារនេះ លោកអ្នកអាចបិទការប្រើប្រាស់ប្រព័ន្ធ Thunderbolt នៅក្នុងប្រព័ន្ធប្រតិបត្តិការ ដោយប្រើរន្ធភ្ជាប់នេះសម្រាប់តែជាមួយនឹង monitor ប៉ុន្តែវិធីនេះក៏មិនអាចជៀសវាងពីការវាយប្រហារបានទាំងស្រុងនោះដែរ។ អ្វីដែលល្អបំផុតនោះគឺ លោកអ្នកគួរតែចៀសវាងទុកកុំព្យូទ័រចោល ដែលអាចឱ្យជនអនាមិកមានឱកាសអាចប៉ះពាល់បាន ដូចជានៅក្នុងបន្ទប់សណ្ឋាគារជាដើម…៕
