បន្ទាប់ពីកូដរបស់កម្មវិធីដែលអាចប្រើដើម្បីវាយប្រហារកុំព្យូទ័រប្រើប្រព័ន្ធប្រតិបត្តិការ Windows 10 ត្រូវបានផ្សព្វផ្សាយកាលពីសប្ដាហ៍កន្លងទៅ នាយកដ្ឋានរក្សាសន្តិសុខសង្គម (Department of Homeland Security) បានចេញប្រកាសឱ្យអ្នកប្រើប្រាស់ធ្វើបច្ចុប្បន្នភាពកុំព្យូទ័ររបស់គេជាបន្ទាន់ ប្រសិនបើពួកគេពុំបានធ្វើបច្ចុប្បន្នភាពក្នុងរយៈពេលប្រមាណ៣ខែចុងក្រោយនេះ។
ការវាយប្រហារនេះត្រូវបានគេឱ្យឈ្មោះថា SMBGhost ដោយប្រើភាពចន្លោះប្រហោងនៅពេលដែល Windows ធ្វើការទាក់ទងជាមួយ Printer ឬ File Server។ បន្ទាប់ពីការជ្រៀតចូល អ្នកវាយប្រហារអាចគ្រប់គ្រងកុំព្យូទ័រ និងបញ្ចូលមេរោគផ្សេងៗដូចជា malware និង ransomware តាមរយៈអុីនធ័រណេតបាន ហើយអ្វីដែលជាបញ្ហាកាន់តែធំនោះគឺ កម្មវិធីនេះជាប្រភេទ ‘Wormable’ ដែលអាចឆ្លងតាមប្រព័ន្ធបណ្ដាញ និងបន្តធ្វើឱ្យរីករាលដាលពាសពេញពិភពលោកបានថែមទៀតផង។
ទោះបីក្រុមហ៊ុន Microsoft បានធ្វើបច្ចុប្បន្នភាពកែសម្រួលចន្លោះប្រហោងនេះកាលពីខែមីនាកន្លងទៅហើយក៏ដោយ ក៏នៅតែមានកុំព្យូទ័រជាច្រើនដែលនៅមិនទាន់ត្រូវបានធ្វើបច្ចុប្បន្នភាពនៅឡើយទេ ដូច្នេះនាយកដ្ឋានប្រឆាំងបទល្មើសបច្ចេកវិទ្យា សូមឱ្យអ្នកប្រើប្រាស់ទាំងអស់ ចាប់ផ្តើមធ្វើបច្ចុប្បន្នភាពជាបន្ទាន់ដើម្បីការពារពីការវាយប្រហារនេះ។ សូមបញ្ជាក់ផងដែរថា បញ្ហានេះប៉ះពាល់តែ Windows 10 ប៉ុណ្ណោះ សម្រាប់ Windows ជំនាន់មុនៗនោះមិនមានបញ្ហាអីទេ៕
