គេហទំព័រព័ត៌មាន Malaysiakini ដែលមានអ្នកចូលអានច្រើនក្នុងប្រទេសម៉ាឡេស៊ីបានជាប់ចោទពីបទធ្វើអត្ថាធិប្បាយទិតៀនប្រព័ន្ធតុលាការ និងដែលបទអត្ថាធិប្បាយនោះត្រូវបានបង្ហោះដោយអ្នកប្រើអ៊ីនធ័រនែតចំនួន ៥នាក់។ តុលាការយល់ឃើញថា បទអត្ថាធិប្បាយនោះអាចធ្វើឱ្យអន្តរាយដល់ទំនុកចិត្តរបស់សាធារណជនចំពោះប្រព័ន្ធតុលាការ។ ចៅក្រមលោកស្រី Rohana Yusurt បានបញ្ជាក់ថា បទអត្ថាធិប្បាយដែលបានចុះផ្សាយនៅលើគេហទំព័រ Malaysiakini មានការស្តីបន្ទោស និងមានបង្កប់ដោយទឡ្ហីករណ៍នៃអំពើពុករលួយដែលគ្មានការពិត និងក្លែងក្លាយ។ នៅក្នុងសាលក្រម លោកស្រី Rohana Yusurt បានតម្រូវឲ្យគេហទំព័រ Malaysiakini បង់លុយចំនួន ១២០ ០០០ដុល្លា។
ចំណែកលោក Steven Gan ដែលជានិពន្ធនាយក និងជាស្ថាបនិក Malaysiakini ត្រូវបានចៅក្រមសម្រេចឲ្យរួចពីការជាប់ក្នុងពន្ធនាគារ។ « ការផាកពិន័យក្នុងទឹកប្រាក់ដ៏ច្រើនសម្បើមលើយើងនេះមិនត្រឹមតែជាការប៉ុនប៉ងដើម្បីបំបិទមាត់យើងប៉ុណ្ណោះទេ តែក៏ជាការប៉ុងប៉នដើម្បីបិទទ្វារយើងទៀតផង » នេះការថ្លែងរបស់លោក Steven Gan នៅចំពោះមុខក្រុមអ្នកកាសែត។ គួរបញ្ជាក់ថា Malaysiakini ជាគេហទំព័រព័ត៌មានឈានមុខគេមួយនៅម៉ាឡេស៊ីដែលបានផ្សព្វផ្សាយនូវអត្ថបទជាច្រើនស្តីពីរឿងអាស្រូវពុករលួយដែលមានជាប់ពាក់ព័ន្ធនឹងថ្នាក់ដឹកនាំនយោបាយ។ គឺ Malaysiakini ដែលបានចុះផ្សាយយ៉ាងផុសផុលនូវការលួចបង្វែរលុយរាប់ពាន់លានដុល្លារនៅក្នុងមូលនិធិ 1MDB រហូតមានការកោះហៅអតីតនាយករដ្ឋមន្រ្តីលោកណាហ្ស៊ីប រ៉ាហ្សាក់ និងបក្ខពួករបស់លោកទៅសួរនាំនៅតុលាការ។
សម្រាប់នាយករងអង្គការ Human Rights Watch ប្រចាំតំបន់អាស៊ីលោក Phil Robertson ការចោទប្រកាន់លើគេហទំព័រ Malaysiakini ជាការរំលោភយ៉ាងច្បាស់ក្រឡែតលើសេរីភាពក្នុងការបញ្ចេញមតិ និងលើប្រព័ន្ធផ្សព្វផ្សាយ។ ក្តីបារម្ភពីសេរីភាពសារព័ត៌មាននៅម៉ាឡេស៊ីតាមរយៈការកាត់ទោសលើគេហទំព័រ Malaysiakini ក៏មានពីស្ថានទូតអាមេរិក ឯកអគ្គរាជទូតអង់គ្លេស និងឯកអគ្គរដ្ឋទូកាណាដាប្រចាំម៉ាឡេស៊ីដែរ។ មានការកត់សម្គាល់ឃើញថា សញ្ញានៃការធ្លាក់ចុះសេរីភាពក្នុងការបញ្ចេញមតិនៅម៉ាឡេស៊ីបានកើនឡើងខ្លាំងតាំងពីការធ្លាក់រដ្ឋាភិបាលរបស់លោកមហាធៀរ មហាម៉ាត់ក្នុងឆ្នាំ ២០២០ និងការឡើងកាន់អំណាចរបស់រដ្ឋាភិបាលចម្រុះដោយគ្មានការបោះឆ្នោត៕
