អ៊ីតាលីបានបណ្តេញមន្រ្តីរុស្ស៊ីពីរនាក់ ចេញពីប្រទេសកាលពីថ្ងៃពុធ ៣១ មីនាម្សិលមិញ បន្ទាប់ពីរកឃើញថាប្រធានក្រុមកងទ័ពជើងទឹកអ៊ីតាលីម្នាក់បានលក់ឯកសារសម្ងាត់ទៅឲ្យមន្រ្តីរុស្ស៊ី។ នេះគឺជាបញ្ហាធ្ងន់ធ្ងរបំផុតដែលអ៊ីតាលីពើបប្រទះជាមួយរុស្ស៊ីចាប់តាំងពីចប់សង្រ្គាមត្រជាក់មក។ បញ្ហាថ្មីចុងក្រោយនេះក៏បានរំឭកផងដែរពីហេតុការណ៍ក្នុងឆ្នាំ ១៩៨៩ នៅពេលដែលចារកម្មរុស្ស៊ីនិងប៊ុលហ្គារីត្រូវបានគេរកឃើញនៅក្នុងប្រទេសអ៊ីតាលី។
ប្រធានក្រុមនាវាយាមត្បាតអ៊ីតាលីខាងលើត្រូវបានចាប់ខ្លួនពីបទធ្វើចារកម្ម ក្រោយពីបានលួចទៅជួបប្រជុំជាសម្ងាត់ជាមួយមន្ត្រីយោធារុស្ស៊ីមួយរូបកាលពីល្ងាចថ្ងៃអង្គារនៅក្នុងទីក្រុងរ៉ូម។ នេះបើយោងតាមសេចក្តីថ្លែងការណ៍របស់ប៉ូលិស។
កងកម្លាំងប៉ូលិសប្រតិបត្តិការពិសេសរបស់អ៊ីតាលី បានតាមទៅដល់កន្លែងណាត់ជួបនោះ និងបានចាប់ឃាត់ខ្លួនអ្នកទាំងពីរ។ ប៉ុន្តែមានតែប្រធានក្រុមនាវាត្បាតអ៊ីតាលីម្នាក់ប៉ុណ្ណោះត្រូវបានចាប់ខ្លួនក្រោមបទចោទប្រកាន់ប្រគល់ឯកសារសម្ងាត់ជាថ្នូរនឹងប្រាក់។មានមន្ត្រីរុស្ស៊ីពីររូបដែលជាប់ពាក់ព័ន្ធនឹងបទចារកម្មប្រមូលឯកសារសម្ងាត់របស់អ៊ីតាលីនេះ។ ម្នាក់ជាមន្ត្រីយោធារុស្ស៊ី និងម្នាក់ទៀតគឺមន្ត្រីទូតរស្ស៊ី។ ក៏ប៉ុន្តែប៉ូលិសអ៊ីតាលី មិនអាចចាប់ឃុំខ្លួន មន្ត្រីទូតរស្ស៊ីបានទេ ដោយសារមន្ត្រីរូបនេះមានអភ័យឯកសិទ្ធិការទូត។
រដ្ឋមន្ត្រីការបរទេសអ៊ីតាលីលោក Luigi Di Maio បានកោះហៅឯកអគ្គរដ្ឋទូតរុស្ស៊ីប្រចាំនៅទីក្រុងរ៉ូម លោក Sergey Razov នៅព្រឹកថ្ងៃពុធ ៣១ មីនា ដើម្បីធ្វើការតវ៉ាជាផ្លូវការ។ ខាងក្រសួងការបរទេសអ៊ីតាលីក៏បានជូនដំណឹងឯកអគ្គរដ្ឋទូតរុស្ស៊ីផងដែរអំពីការបណ្តេញចេញពីប្រទេសជាបន្ទាន់នូវមន្រ្តីរុស្ស៊ីពីររូបដែលជាប់ពាក់ព័ន្ធនឹងបទចារកម្ម។គួរបញ្ជាក់ថា ប្រធានក្រុមនាវាយាមត្បាតអ៊ីតាលីគឺជាបុគ្គលិកធ្លាប់បម្រើការនៅការិយាល័យការពារជាតិ និងធ្លាប់មានសិទ្ធិចូលមើលឯកសារជាច្រើនទាក់ទងនឹងសកម្មភាពការពារជាតិរបស់អ៊ីតាលី ហើយនិងអង្គការអូតង់។ នេះបើតាមកាសែតអ៊ីតាលី La Repubblica។
បើតាមការចុះផ្សាយរបស់កាសែតអ៊ីតាលីផ្សេងទៀត មន្ត្រីអ៊ីតាលីខាងលើទទួលបានលុយជាសាច់ប្រាក់ចំនួន ៥ ០០០ អឺរ៉ូ ឬស្មើនឹង ៥ ៨៦០ ដុល្លារអាមេរិកពីមន្ត្រីរុស្ស៊ី។ប៉ូលិសអ៊ីតាលីបាននិយាយថាអំពើចារកម្មត្រូវបានគេរកឃើញបន្ទាប់ពីមានការស៊ើបអង្កេតជាយូរ ដោយមានការដឹកនាំដោយទីភ្នាក់ងារស៊ើបការណ៍សម្ងាត់ AISI របស់អ៊ីតាលី និងដោយមានការគាំទ្រផងដែរពីប្រធានបុគ្គលិកការពារជាតិ៕
