ប៉ូលិសបាននិយាយថា ស្ត្រីហុងកុងអាយុ ៩០ ឆ្នាំម្នាក់ត្រូវបានជនឆបោកបន្លំធ្វើជាមន្ត្រីចិនលួចបន្លំយកទឹកប្រាក់អស់ចំនួន ៣២ លានដុល្លារអាមេរិក។ ស្រីចាស់ជរានៅក្នុងទីក្រុងហុងកុងរងការយាយីដោយជនឆបោកតាមទូរស័ព្ទដែលស្វែងរកជនរងគ្រោះដែលងាយរងគ្រោះ និងអ្នកមានដែលមានបំណងផ្ទេរប្រាក់ ឬធ្វើការវិនិយោគក្លែងក្លាយ។
កាលពីថ្ងៃអង្គារ ទី២០ ខែមេសានេះ ប៉ូលិសបាននិយាយថា ជនបោកប្រាស់បានតម្រង់គោលដៅទៅលើស្ត្រីវ័យចំណាស់ម្នាក់ដែលរស់នៅក្នុងផ្ទះមួយនៅលើ The Peak ។ នៅរដូវក្តៅមុននេះ ក្រុមឧក្រិដ្ឋជនបានទាក់ទងស្ត្រីដែលមិនបញ្ចេញឈ្មោះដែលធ្វើពុតជាមន្ត្រីសន្តិសុខសាធារណៈចិន។ ពួកគេបានអះអាងថា អត្តសញ្ញាណរបស់នាងត្រូវបានប្រើប្រាស់នៅក្នុងករណីព្រហ្មទណ្ឌធ្ងន់ធ្ងរមួយនៅក្នុងប្រទេសចិនដីគោកនេះ។
ប្រភពពីប៉ូលិសបាននិយាយថា នាងត្រូវផ្ទេរប្រាក់ពីគណនីធនាគាររបស់នាងទៅក្នុងគណនីមួយដែលត្រូវបានកាន់កាប់ដោយក្រុមស៊ើបអង្កេតដើម្បីរក្សាសុវត្ថិភាព និងត្រួតពិនិត្យ។ ប៉ូលិសបាននិយាយថា ច្រើនថ្ងៃក្រោយមកមនុស្សម្នាក់បានមកដល់ផ្ទះរបស់នាងដោយប្រើទូរស័ព្ទចល័ត និងស៊ីមកាតដើម្បីទំនាក់ទំនងជាមួយភ្នាក់ងារសន្តិសុខក្លែងក្លាយដែលបានបញ្ចុះបញ្ចូលនាងឱ្យធ្វើការផ្ទេរប្រាក់សរុបចំនួន ១១ លើក។
អស់រយៈពេលជាង ៥ ខែនេះ ស្ដ្រីចំណាស់បានប្រគល់ប្រាក់ចំនួន ២៥០ លានដុល្លារហុងកុង (៣២ លានដុល្លារអាមេរិក) ដល់អ្នកបោកប្រាស់ដែលជាចំនួនធំបំផុតមិនធ្លាប់មាននោះទេ។ ប៉ូលិសបាននិយាយថា ការឆបោកនេះត្រូវបានគេរកឃើញដោយសារតែជំនួយការក្នុងផ្ទះរបស់ស្ត្រីចំណាស់ម្នាក់គិតថាមានអ្វីដែលគួរអោយសង្ស័យកំពុងកើតឡើង ហើយបានទាក់ទងកូនស្រីរបស់ថៅកែនាង និងជូនដំណឹងទៅមន្ត្រី៕
សម្រួល៖ សុផា
