ខណៈពេលដែលប្រទេសជាច្រើននៅជុំវិញពិភពលោកកំពុងចាប់ផ្តើមទទួលយកនូវបច្ចេកវិទ្យា 5G នោះ ក្រុមហ៊ុនបច្ចេកវិទ្យាយក្សរបស់ចិន Huawei បានបង្ហាញអំពីផែនការទៅលើបច្ចេកវិទ្យាជំនាន់ថ្មីទៀតហើយ។ យោងតាមរបាយការណ៍របស់ប្រព័ន្ធផ្សព្វផ្សាយចិនបានអោយដឹងថា ផែនការនេះត្រូវបានបង្ហាញដោយអគ្គនាយករបស់ក្រុមហ៊ុននេះគឺលោក Xu Zhijun នៅក្នុងសន្និសីទមួយនៅទីក្រុង Shenzhen កាលពីដើមសប្តាហ៍នេះ។ លោកនិយាយថាបណ្តាញ 6G នឹងបង្ហាញខ្លួននៅលើទីផ្សារក្នុងរយៈពេលតិចជាង ១០ ឆ្នាំទៀត។ បច្ចេកវិទ្យានេះនឹងបង្ហាញខ្លួននៅឆ្នាំ ២០៣០ ។
ក្រុមហ៊ុន Huawei បានប្តេជ្ញាថានឹងចេញផ្សាយក្រដាសស (White Paper) ដែលពន្យល់ពីចក្ខុវិស័យរបស់ខ្លួនសម្រាប់ការអភិវឌ្ឍបណ្តាញជំនាន់ក្រោយនាពេលអនាគតនេះ។ ខណៈព័ត៌មានលម្អិតអំពីបច្ចេកវិទ្យានេះកម្រចែកចាយណាស់ សារព័ត៌មាន CGTN របស់ចិនបានរាយការណ៍ថា បណ្តាញ 6G អាចលឿនជាងបច្ចេកវិទ្យារបស់ 5G ដល់ទៅ 50 ដង។ សម្រាប់បណ្តាញ 5G អនុញ្ញាតឱ្យផ្ទេរទិន្នន័យរហូតដល់ 20 ជីហ្គាបៃក្នុងមួយវិនាទីខណៈពេលដែលបណ្តាញ 6G អាចឈានដល់ 1,000 ជីកាបៃក្នុងមួយវិនាទី។ ខណៈពេលដែលបច្ចេកវិទ្យានេះពិតជាអាចឱ្យអ្នកប្រើប្រាស់ទាញយកអ្វីៗគ្រប់យ៉ាងពីកម្មវិធី Apps រហូតដល់ទៅវីដេអូកាន់តែលឿនជាងមុននោះ បច្ចេកវិទ្យា 6G នេះក៏អាចអនុញ្ញាតឱ្យប្រើប្រាស់អ៊ីនធឺរណិតក្នុងចលនាល្បឿនលឿនដូចយន្តហោះថែមទៀត។
គួរបញ្ជាក់ផងដែរថា ក្រុមហ៊ុន Huawei គឺជាមេដឹកនាំឈានមុខគេមួយក្នុងការអភិវឌ្ឍន៍ទៅលើបច្ចេកវិទ្យា 5G ប៉ុន្តែប្រទេសមួយចំនួនបានសំរេចចិត្តរឹតត្បិតការប្រើប្រាស់ឧបករណ៍របស់ក្រុមហ៊ុននៅពេលមានសម្ពាធជាច្រើនពីសហរដ្ឋអាមេរិក។ នៅឆ្នាំ ២០១៩ ក្រុមហ៊ុនបច្ចេកវិទ្យានេះបានបង្ហាញថាខ្លួនបានចាប់ផ្តើមធ្វើការនៅលើបណ្តាញ 6G ជា“ យូរមកហើយ” ។ នាយកប្រតិបត្តិរបស់ក្រុមហ៊ុន Huawei លោក Ren Zhengfei បាននិយាយថាបច្ចេកវិទ្យានៅតែស្ថិតក្នុងតំណាក់កាលដំបូងនៅឡើយទេ ប៉ុន្តែនៅក្នុងពេលមិនដល់ ១០ ឆ្នាំទៀតនោះទេវានឹងក្លាយជាការពិត៕
សម្រួល៖ សុផា
