សហរដ្ឋអាមេរិក៖ នាយកដ្ឋានប៉ូលិសក្រុងបញ្ជាក់ថា ពួកគេរងការវាយប្រហារតាមអ៊ីនធឺរណិត ក្រោយពីក្រុមអ្នកវាយប្រហារ Babuk បញ្ចេញរូបថតអេក្រង់ដែលជាការលួចទិន្នន័យរបស់ប៉ូលិសនៅក្នុងវេទិកាហេគ (hacker forums)។
នាយកដ្ឋានប៉ូលិសក្រុង (The Metropolitan Police Department) ត្រូវបានគេស្គាល់ថាប៉ូលិស DC ឬ MPD គឺជាភ្នាក់ងារអនុវត្តច្បាប់បឋមសម្រាប់ទីក្រុងវ៉ាស៊ីនតោនឌីស៊ី ដែលជារដ្ឋធានីរបស់សហរដ្ឋអាមេរិក។
ប៉ូលិសដឹងពីការលេចធ្លាយទិន្ន័យនេះ ក្រោយពីក្រុមហេគឃ័របានបង្ហោះរូបថតអេក្រង់ជាច្រើន និងអាងថា ជាទិន្ន័យដែលពួកគេបានលួចអំឡុងការវាយប្រហារ។ រូបថតអេក្រង់មួយក្នុងចំណោមរូបថតអេក្រង់ជាច្រើនមានបន្ថែមទាំងកំណត់ត្រាពេលវេលាលើកញ្ចប់ទិន្ន័យដូចជា ៤/១៩/២០២១ ដែលទំនងជាពេលវេលាដែលហេគឃ័រ បានលួចយកទិន្នន័យ។
លើសពីនេះ ហេគឃ័រ Babuk បានចង្អុលបង្ហាញយ៉ាងច្បាស់ពីឯកសារមួយច្បាប់ទំនងជាមានពាក់ព័ន្ធទៅនឹងការចាប់ខ្លួនអ្នកនៅពីក្រោយការតវ៉ានៅថ្ងៃទី៦ ខែមករា ដែលបានសម្រុកចូលទៅក្នុងអាគារ Capital Building។
បច្ចុប្បន្ន ប៉ូលិស DC បញ្ជាក់ថា ពួកគេកំណត់អត្តសញ្ញាណម៉ាស៊ីនមេបំពានបានហើយ និងលើសពីនេះ ភ្នាក់ងារ FBI កំពុងតែធ្វើការស៊ើបអង្កេតលើបញ្ហានេះ៕
ប្រែសម្រួល៖ ប៉ោក លក្ខិណា
ប្រភពព័ត៌មាន bleepingcomputer ចុះផ្សាយថ្ងៃទី២៦ ខែមេសា ឆ្នាំ២០២១
